Le Ciacolone - Marieta e Nineta: "104 ani de sfiga"

Le Ciacolone - Marieta e Nineta: "104 ani de sfiga"

Donosimo jedan od razgovora iz satirične emisije na istrovenetskom dijalektu o aktualnostima u Istri, a koji put i malo šire, naravno, ako ih je volja. Le Ciacolone emitiraju se svake nedjelje u 16:40, a duhovitu emisiju vode Marieta i Nineta.

Ècome pronta, Marieta mia bela! Come va, come ti staghi, cosa ti fasi? Ma cosa njanca domando, za so, mile robe come senpre, una ti finisi, una ti fasi e una ti pensi...Ti mai co le man in man, ma dove ti cioghi duta 'sta energia?...

Mi invese co 'ste giornade più curte, me manca cualche ora de luce, me manca de star fora a l'aria...go cali de sucheri...e casco in te la fiapitudine.

Go pensà: ma cosa, me toca solo a mi 'ste robe? E par darme un andy, come che se dizi, me son ciolta el computer e go dito: me faso una cultura, e zbiziga zbiziga...sperando in cualcosa de alegro te  trovo che no ze solo el 2020 l'ano dezgrasià che ne ga meso in zenocio...le robe ze scominsiade prima sai, sai prima...sa che alegria! Ma njente ah, se vojo farme una cultura legio!

Eco, prova a imaginar che par più de un ano el mondo sia coverto de un forte caligo che no se sa spiegar de dove che el riva, che el sol sia praticamente sparì, che el rivi far luce tanto cuanto un cuarto luna, e che dopo de questo vegnisi una pandemia che se magnasi meza umanità. Podemo anca no creder, ma l'omo ga passà anca cuesto! Se ogi vivemo un ano pezante, difisile, ti pensa quanto più pezante e difisile doveva sier el 536 co' ze sucese dute 'ste robe brute. Ogi se sa che cuel caligo jera sènera, conseguensa de l'erusion de'l vulcano che ga coverto meza Europa, l'Oriente, l'Azia...par dizdoto mezi el sol jera praticamente sparì, faseva un fredo de cani, e no basta, cualche ano dopo: la peste, la prima pandemia de la storia. Pena nel 640 pian pian, l'Europa se ga tirà fora. Femo un fia' de conti: dal 536 al 640...ze un cualcosa come 104 anni, ma ti te rendi conto? 104 anni! Poveri dizgrasiai 'sti nostri antenati...epur i ga vu la forsa de andar vanti...(e guai se no, parchè altrimenti ogi noi no fusimo cua!) Sa cosa, se ghe la ga fata lori, nudi e crudi...tanto mejo noi che gavemo el cul pièn e anca se malmesi ze sempre poco in confronto a cuel che i ga pasà lori. E noi gavemo anca la bela notisia che lori se la sognava: el vacino ze pronto, no uno, ma adiritura tre, e i paresi sicuri dal 90 al 94%. No se sa ancora se servirà vacinarse più volte, par cuanto tenpo el funsionarà, ma intanto una luce...ma che digo luce, un rifletor, in fondo al tunel ze.

Mare mia, go sentù che anca par cuesto Trump, se bati su'l peto...tipo "El vacin american ze el mejo...e cuesto grasie a mi!!!"

Sa cossa? Persa la caregheta lasemo che el se cioghi almeno questa sodisfasion...che de altre el ghe ne deve ver sai poche!!!

Ma ti lo ga visto in version cavel grigio topo? Go pensà che  sensa el titolo de „Mister president“ el sta perdendo in sicuresa, in autostima...che l'omo me va in depresion...ma me zbaljavo. Me dizeva una mia amica psicologa che invesse el cavel grigio- bianco ze simbolo de forte autostima, de deziderio de sier visto come punto de riferimento, de distingurerse de la masa...Bel mio omo, par distinguerse el se distingui, no ze che dir.

Ma sa che el ghe ga domandà a Melania se i sui ga ancora la "vikendisa in Slovenia"? Cosa ti dighi, dovemo preocuparse?...Intanto, se no altro, gavemo capì che i fili de argento no ne devi far paura, ansi...anca se pensavo de farme rossa...ah? Rossa de mal pel...e invesse no, no me farò njente parchè cuela scuinsia de la mia vizina, ga dito che „ el roso su una dona de una certa età  fa tanto menopauza."

Bruta smonta altarini....alora me farò le striche, sì...onji tanto una riga bionda...ciapa su e porta a caza...

E no basta, dopo farò anca un giro, poso sielzer tra crocera, oroplan, me par che sia anca el treno, in ogni cazo  se ciama „crocere verso el njente“, „voli sensa destinasion..“ „viagi a svodo“e in 'sti tempi i va nome che ben. In sostansa ze viagi che no va da nisuna parte...ti fasi un giro e ti torni caza...un fia' come i trenini de capodano, che ti giri e ti giri e ti son sempre là...

Ciao cuor, par ogi me fermo cua...mi speto el pacheto che ti me ga promeso, come cual? Cuel co'l pandespanja...e me racomando, che no'l sia tropo suto!!!  Ogi un saludo demensial cuanto basta:

se saria can , bauuuu

se saria gato, miauuuuu

ma ze tardi....alora....ciaooooo!