Le Ciacolone Marieta e Nineta - "Scarpete rose e 29 novembre"

Le Ciacolone Marieta e Nineta - "Scarpete rose e 29 novembre"

Donosimo jedan od razgovora iz satirične emisije na istrovenetskom dijalektu o aktualnostima u Istri, a koji put i malo šire, naravno, ako ih je volja. Le Ciacolone emitiraju se svake nedjelje u 16:40, a duhovitu emisiju vode Marieta i Nineta.

"29 novembre e...El pibe de oro"

       Nineta mia, co'l tuo belisimo discorso su la violensa su le done ti me ga lasà sensa parole...e no go njente altro de dir se no che le violense che fa più mal, come che ti ga dito ti, ze cuele silensioze, cuele che tra i cuatro muri riva giosa dopo giosa, come una tortura cineze, cuele che diventa purtropo "normalità", parte de la zornada e cuele a cui le done no ghe fa cuazi più cazo, parchè le ze talmente dentro el vortice che no le ga più forse par reagir...e no le se acorzi che le sprofonda, le se anula, le va senpre più zo in cuele sabie mobili che dovesi eser la fameja...

No, Nineta, mi no go meso le scarpe rose su'l balcon 'sto ano, ma solo parché no le go...altrimenti lo gavesi fato...

Jebiga, co's ti vol, no ze soldi par conprarse un per de scarpete rose purtropo...e el vecio imatonì carigo de soldi de spozar e spetar che el mori no lo go ancora trovà...Magari se me meto far el pesto de matina presto lo trovo...Nooo...trovasi solo una suocera rompibale!

       Nineta, ti me ilumini onji volta:29 novembre...ara che mona che son, no go vardà el calendario e no me go inacorto...

Mah...par ti sarà stà anca bel...par mi, che jero fiòi, jera...come...come dir...sensa ofender nisun? Ridicolo!

I me meteva cuela cotoleta blu plisetada, la camiza bianca che su de mi durava bianca 20 minuti e dopo la jera za maciada, cuei calsetoni bianchi in coton ricamà che gratava a bestia...co l'astico che strenzeva i polpaci fina a blocar la circolasion...e le scarpete nere lacade che strenzeva i pìe...e po', mi go la testa picia...sarà che no go servel...e la bustina me cascava senpre o la stava par traverso che parevo una disposente...E che no parlemo de'l fasoleto che me sofigava...e cuel anelin...cuel anelin che lo tenjiva strento! Cuante volte lo go perso e trovà cuel anelin...mare mia...

       Ma sa cos'che jera la roba più asurda? Le cansoni che i ne faseva inparar. Bon cuele in italian che almeno capivimo cosa che cantàimo...ma cuele in serbo-croato? Figurite cosa che capivo in seconda elementare!!! So solo che se sentiva che le parla de guera, co cuele muzica che gnanca Wagner inte i momenti più mistici riva tirar fora.

       E che stress dover star duti in fila...e fermi! Guai a chi che se movi! Nineta, ma ti me imagini a mi, de picia, calma come el mercurio, co l'argento vivo in corpo, a star ferma? No rivo star ferma njanca deso!

       No nego, sarà sta anca bel...ma mi me sentivo in gabia...me pareva de eser in cuei cartoni animati giaponezi do' che ze duti in uniforme...cuei che vardàimo de fioi...e duti vestidi come noi i jera...duti uguali, precizi, spudài...Eco, cuel eser preciza e spudada a cualchidun altro no me ga mai piaso...e no me piazi njanca deso!

       E ti ti me conosi, Nineta...Nineta, ti me pasi de'l 29 novembre, "E viva el comunizmo e la libertà...zan zan!" a la Regina Elizabeta sensa sconporte...e chi ti son? Wonderwoman? Comuncue...anca i dinozauri co' se ga estinto ga pensà la stesa roba che ti pensi ti: "Ma che mondo ghe lasaremo a la Regina Elizabeta?"...Vara, cualsiasi mondo...ela lo refarà!...guidando un fuoristrada par i parchi infiniti de Balmoral...cacchio...faria anca mi la Regina!

Cuazi 100 ani e drita come un razo!

...a propozito de razo: el vacin Sputnik che manda in orbita...Nineta, mio genio! Sputnik però a mi me ga anca de spudacion...me fa un poco schifo a dir la verità...

       Ah, Nineta, uno el ne ze partì in orbita 'sta setimana...i dizi che el ze andà a riportarghe el balon a Dio e che deso, sarà senpre più temporai, parché se el se meti a giogar tra le nuvole...sa che canonade?

Maradona...El pibe de oro! Un muleto venjù su de'l njente che a forsa de piadoni a un balon el ze diventà Re de Napoli e el se ga rampigà a forsa de calci de punisiòn su'l teto de'l mondo!

Un muleto che no ga savù controlar la fama, la celebrità...un muleto che ne ze sta regalà e ne ze sta portà via in un refolo de vento...

Tropo intensa la vita de i geni par eser lunga...

       Ara, ghe ne go sentide tante su de lu 'sti giorni, tante cativerie anche...ma mi no giudico, chisà come saria finida mi a pasar de no gaver niente a gaver duto in batito de cìljo...

E a duti cuei che lo giudica adeso ghe digo solo: Lu iera Diego Armando Maradona, che ve piazi o no...ma voi? Chi se'?

       Bon, te laso cuor, cua i sera de novo duto...me sa che sarò de novo in strada fra poco...devo inventarme un lavor "online"!

Ti me ga dà un'idea, sa? E se me meto far pandespanja e li vendo via internet come regalo de Nadal? Cos'te par?

"Pandespanja istrian: ghe piazi a duta la fameja, anca al can!"

...so...devo lavorar su'l zlogan...ghe penso su...ansi, se te vien cualche idea, dimela...che go poca fantazia 'sti giorni...

E grasie de i sorizi, cuei vien senpre ben...el caval...ti me ga fato morir co la barzeleta de'l caval...

Ciao cuor, se vedemo...magari in video...ma se vedemo e fin che se vedemo, cavoli se va ben!