Hrvatski radio

Radio Pula

18:36 / 07.03.2021.

Autor: Tomislav Šikić

8 marso: giornada de la dona...

8 marso: giornada de la dona...

8 marso: giornada de la dona...

Foto: - / -

Nineta čestita svim Istrijanima jer je Istra ponovo postala zelena zona u Europi. Marieta je primijetila da ljudi govore tiše, što joj odgovara, kao da se boje da će ih netko prijaviti... ali će kratko trajati jer će za dvadeset dana opet biti bučni. Sutra je 8. ožujka, na što su se obje osvrnule.

 

Marieta cara, bona domeniga. Che bel trovarte, magari ti sarà impenjada co'l bareto, tra un tavolo e l'altro cori drento, cori fora ti gavarà de far...ma va ben cusì almeno se lavora e co duto 'sto movimento ti te tenji anca in forma. Ma deso metite comoda almeno per pochi minuti e scoltime, che go robe de contarte...

       Intanto conplimenti a duti i istriani...go visto che l'Istria ze in zona verde, beati voi, noi invese semo anca verdi...ma de rabia, femo un paso vanti e do indrìo. Cualche setimana fa pareva un fia' mèjo e i gaveva molà el pasagio tra le region...ga bastà! Cuel fine setimana penso che se ga calà zo duta la Slovènia, mancava solo cuei che ze andai a siàr...

Rive piene...spiàge piene...distansa? E cosa vol dir? Tanto semo fora, e cusì...pasegiàde co'l zburton par rivar a pasar, mascherine poche...e deso paghemo! De novo restrision, cuele poche boteghe  che i ga lasà verzer, par comprar almeno un fia' de biancheria o do majète, serade de novo...Te poso dir che la ze proprio dura.

       E alora ancora una volta Marieta mia, beati voi, i bareti magari solo fora ma i funsiona, le boteghe lavora, seguì dute le regole, pare finti de tanto che se disiplinài. Sa cosa che penso, che 'sto vostro Kozlevac ghe volesi clonarlo! Gavè uno anca par noi?

Solo pensar de dover star de novo serada in terso pian me vien l'ànsia...un pezo su'l peto che no te digo. Mi volesi saver cuei che no sofri de ansia, cosa i fa nela vita? 'Sto perìodo che vivemo ze cusì asfiziànte, ne stanca, dovemo lavorar de fantazìa par trovar robe bele...

       Doman sarà l'oto marso, giornada de la dona. No so se ti ti te ricordi, ma ani fa tante de noi vedeva cuesta giornada come un ocaziòn par andar fora sole con le amiche, lasando a casa marii, companji, fiòi, par concèderse cualche sfìsio che magari in altre giornade, e speso anca in duti i altri giorni de l'ano, no jera permeso. Pice fughe de la nostra realtà, co'l nostro bel garofano roso in man... Jèrimo contente? No so che dirte, forsi, ma anca no. Parchè lo steso meritàimo cualcosa de più.

       Ti vedi, parole come Libertà, Parità, Cultura par la dona...le par cuele parole che ogi duti mazìna e prometi co' ze elesiòn o altri momenti dove se vota par cualche careghèta.  E invese ti diria ti che le ga quasi 60 ani? Jera le parole d'ordine de'l 1962 par celebrar l'oto marso secondo l'Union de le Done Italiane. Che po' pol sièr el moto par le done de duto el mondo diria mi, e Virginia Wolf lo ga dito sài mejo de mi, senti: "Come dona no go un paèze, come dona no vojo un paèze, come dona el mondo intièro ze el mio paèze..."

       Sa, volesi parlarte de una dona che mi trovo sai coragiosa e che la ga dito de ela: "Se fusi nata in altri tenpi i me gavesi bruzà solo parchè son senpre stada mi stesa." Ela ze Angelina Jolie. E, so, ti me dirà che podevo trovar cualcheduna pià a la man...ma no la gavesi fato el steso efeto, credime. Sta dona cua, che duto el mondo conosi e invìdia, la ga afrontà do mastectomìe preventive par sensibilizar l'opinion publica su un cancro che ghe ga portà via la mama, la zia e la nona, dimostrando che se pol sièr belisime anche dopo duto 'sto calvario. Ze una dona che ga dà la vita, che ga adotà, una dona che sa scoltar, che invita i fiòi a gaver coragio, a ricordar senpre cualcosa che tendemo a perdar de vista: capir chi semo e cosa che raprezentemo. E lotar parchè anca i altri gabi le stese libertà.  Mi spero tanto che cuesto 8 marso ne trovi dute più in forsa, più determinade e fière de'l nostro sièr uniche, magari nel nostro picolo.

Cuor, par ti e par dute le done  mando un maso de mimoze, gialo oro. Chisà parchè proprio la mimoza, forsi parchè la fiorìsi in marso, la ze spontànea, figuroza, la costa poco...e chisà chi che ga vu l'idea de cior proprio 'sto fior. Come in dute le storie bele, anca in cuesta, forsi no se savarà mai de chi ze stada veramente l'idea...vero ze che el suo gialo ne porta el sol!!!

       E deso, con rispeto parlando, gavesi un mesagin par i siòri mas'ci, un sugerimento par un regalin a le donete de caza. Go dito con rispeto parlando parchè de pipì se trata...me spiègo, co' la fe', eco, ze mejo che se sentè, parchè a farla in pìe, altro che droplet...gocioline minuscole che zvolasa par duto in un ragio de novanta centimetri, anca un metro (dipendi da la forsa de'l geto dizemo)...e 'ste schisete se puza su la carta igienica, su'l savon, su i sugamani, su i tapedini, su le piastrele, par tera... Eco, me son spiegada...e visto che se pol evitar...evitemo!!!

       La parolina de ogi? Mah, mi ghe ne gavesi do...se pol? Una sarìa: schisàda, da schisa, "goccia, spruzzata"...in riferimento a'l consiljo par i nostri ometi...osia, femola drento!!! E la seconda  la va ben sia in dialeto che in italian e  saria Rispeto...per domani che ze l'oto marso, la giornada de la dona, e per duto l'ano: rispeto de le diferense, de'l seso, de'l color, de l'età, de i più deboli, de i più veci...rispeto..

Ciao cuor mio, pasa una bela setimana, cura ben le nostre robete in frigo che vegnarà anca i giorni de la libertà...e come senpre mile baziiiiii.

 

Nineta, ti ga visto ah? E semo de novo la mudanda d'Europa!

Ghe gavesi meso un titolòn se gavesi un giornal: "El ritorno de'l perizoma d'Europa"...fina cuando no so, ma intanto tenjimo duro! Pici ma bravi.

       Ah, no, Nineta, me dispiazi ma Kozlevac se lo tenjimo noi...ma sa cos'che ze interesante? Che chi che ne varda de fora ne lo invidia e invese cua i ghe dà anca contro. Ze proprio vero che la zente no ze mai contenta!

E in cuanto a disiplina...speremo...vedemo come che andarà deso che i ga verto le terase. Intanto te poso dir che de una roba son contenta: el monumento a i partigiani cua in piàsa ga finì de eser un "porta-biceri"...Sì, parché la zente, la matina, fina che jera i bar chiùzi, se meteva intorno al monumento e puzava i biceri de'l cafè...Pareva che onji matina ghe fussi una comemorasion!

       Ma ti ga oservà una roba, Nineta? La zente sentada al bar no fa più cazìn come prima. I parla soto voze, cuàzi che ancora no i fusi sicuri de poder star sentài...come se i spetasi che cualchidun ghe fasi la spia che i ze fora de caza. E mi no me dispiazi sa se no son circondada de zente che sìga.

Che el Covid ghe gabi inparà un poca de educasiòn? Nooo, no credo...Penso sia la novità, la sindrome de ritorno a una cuazi normalità...Fra 20 giorni li gavarò de novo duti come sìmie scanpade zoo...son sicura! 

       Ma bel mio cuor, doman ze l'oto marso, ze vero! Sa, mi no go mai capido parché le done ga de andar fora a sfogarse par l'oto marso o le speta cualche adìo al nubilato par dar el pezo de se' e trasformarse in brute copie de i mas'ci. Bon, so, so Nineta, mi son un cazo a parte, no son spozada, no go fiòi e nje nje nje...come se fusi una colpa el fato de sièljer la propria vita in 'sto mondo stereotipado...Comuncue anca mi cuando gavevo un morozo (a i tenpi de Napoleone) stavo de più a caza...Bon co' uno stavo sài caza parché el me sofigava...infati dopo de cuela storia co'l cavolo che divento un tapedin, go senpre la spada pronta e no soporto più cuei che vol comandar...parché no ze njente de comandar in una copia...duto cua... In fondo, credo che dovesimo senplicemente pensar che no ne servi l'oto marso par sfogarse, no ne servi una festa par far festa.

       A dir la verità mi, come dona, no me sento inferiore a nisun, no me sento meno inteligente, meno capace, meno izenjòza, meno pratica de un omo. E a vardarne nudi e crudi come che semo, no semo tanto diversi. L'unica diferensa ze che storicamente fina a poco tenpo fa noi done se gavemo lasà incadenar e comandar e deso no più...par el resto, e tacandome a'l tuo discorso de la pipì...Mi che lavoro in un bar e neto i gabineti finido el turno, credime, cualche volta preferiso cuel de i mas'ci.

       Noi done par eser veramente noi stese dovemo finirla de far le bigote-perbeniste co' semo a caza: "e meti a posto e no butar le calse partera, e no far fregole e varda come che ti vadi in giro e manja co la boca chiuza..." ma ti vivesi co una sanguisùga che te ciucia el sangue duto el giorno? Mi, no! Ma pena che andemo fora se conportemo secondo le legi de la giungla...par vero: come se i ne gavesi verto de sorpreza la gabia: e se metemo in mostra, e semo volgarote, e sighemo, cantemo e balemo su i tavoli come se no ghe fusi un domani...E automaticamente cuesto ne torna inte i 364 giorni che no ze l'oto marso... Se fusimo senplicemente noi onji giorno, no gavesimo bizonjo de estreme valvole de sfogo. Mi te parlo par la mia esperiensa, Nineta, e sì, done mie, i conplimenti no ne fa creser ma l'autocritica sì...e alora par l'oto marso, man su'l cuor, ve auguro de trovar, capir e amar i vostri difeti...solo cusì tirarè fora el vostro caratere e inpararè e eser voi stese e no sentirve tra virgolete: inferiori. Ve auguro de volerve ben onji giorno e no par le feste comandade. E ti ga fato ben a mensionar Angelina Jolie, Nineta, parché ze una che ga uzado co inteligensa la sua belesa, costruindo una sua identità su'l famozo: "Ma chi se ne frega de cosa che dizi la zente!"...che in fondo ze cuel che dovesimo far duti. E po', se se ciama zente e no ga njanca un nome...cuanto ne pol interesar de cos'che i parla?

       Nineta, te laso co una parola magica ogi: Teatro...sì parché ze ancora in corso L'inverno teatrale...la Kazališna zima, cua de noi...e el Teatro popolare de Pola co la colaborasion de la Region Istriana ofri due bei spetacoli...Zente, andè a teatro che mal che vadi ve farà rider, sonjar, pensar o non pensar par una sera...e de sicuro venjarè fora migliori de come se andai dentro...

       Ciao Nineta...ah, i me ga regalà una botilja de moscato, cua, i vinài de Momian...ma mi son alergica al vin...cosa faso? Te la spediso o la meto in frigo? Ciao cuor!!! Baziiiiiiiii

 

 

 

 

 

Programe Hrvatskoga radija slušajte na svojim pametnim telefonima i tabletima preko aplikacija za iOS, Android i Huawei.