Hrvatski radio

Radio Pula

Con la radio el mondo in caza / Nisun rispeto par le done

18.04.2021.

18:39

Autor: Tomislav Šikić

Con la radio el mondo in caza / Nisun rispeto par le done

Con la radio el mondo in caza / Nisun rispeto par le done

Foto: - / -

Nineta podsjeća na to da je 13. travnja bio "Međunarodni dan poljupca", ali malo se njih poljubilo ove godine... Marieta komentira jednoga japanskog gospodina i kaže da se na Zapadu na starije gleda kao na teret, a ne kao na resurs.

Bela la mia Marieta, alora? El bareto ze verto? Te domando parchè me par de ver leto che de voi i gabi de novo meso restrision più severe visti i numeri de pozitivi  che cresi onji giorno. In Slovenia invese pian pianin i mola, paresi che el „duti a caza„ de ùndize giorni che se ga fato de'l primo de april cualcosa de bon gabi portà. Sicome par esperiensa ormai savemo che onji molada una zbrisada, speremo de no cascar de novo inte'l buzo nero.

Se no ti lavori Marieta, no avilirte, co' ti son sola caza inpisa la radio che te farà companìa, crèdime, la ze come la comare de una volta che venjiva in caza a far do ciàcole e, in 'sto perìodo che in caza ze mejo che no venji nisun, meno che meno le comari, la radio ze una mana de'l ciel, la te fa conpanìa sensa farte pèrdar tenpo, no ti devi rispònderghe e njanca far finta de scoltarla. E co' ti te stufi ti la distudi.

E po, bela mia, la radio no fa solo ciacole de caza ma la te porta par el mondo. Mi in 'sti giorni me son fata una bela cultura e jero in Giapon, in America e anca in Inghiltera sensa moverme de caza, cusì, tanto par dirte. Ti ti savevi che in Giapon ze cuazi otantamila persone de sento ani? Ma no parchè i stà sentài, distirài duto el santo giorno spetando che el figo ghe caschi in boca. I ze ativi, i se movi, ti pensa che un sior che se ciama Takimika (basta pensar a tacamaco e ti te ricordarà el nome), novanta ani l'omo  e el fa l'istrutor de fitness, e no el ga scominsià a vinti ani, ma a sesantasìncue e ti pensa che el suo istrutor personal gaveva 79 ani.  'Sto Takimika se alsa a le 3 de matina, el camina cuatro chilometri, a le 7 el manja zgombro a i feri o salmon e altre robe strane dute fermentade, par pranso una banana, po' alenamenti su alenamenti e par sena dute le verdure de 'sto mondo, galina e do biceri de nero. E sa anca parchè el fa duta 'sta ginastica? Parchè el ga scoperto che cusì ghe vien le spale larghe, el vitin de vespa e el bel culeto streto, a la braziliana.  Mah, noi el ne va ben anca a l'istriana, parchè gavemo più sielta: cul alto, in cantina, culeto a mandolin, a chitarina, largo, streto, inplacà, a lieròn e duto cuesto sensa tropa ginastica e sensa alsarse a le tre de matina. Una bela sodisfasion dirìa, duta sta varietà...Resta el fato cuor, che la regola de seguir ze una: no se ze mai tropo veci par scominsiar cualcosa. E questo volesi dir: alsar el cul e moverse!!!

Ma no ze duto, sempre scoltando la radio go sentù che Trump (l'omo de'l canarin in testa, come che ti dizevi ti) el ga fato un novo sito, se dizi cusì vero?), a'l computer che da la posibilità a chi che vol de prenotar „Donald e Melania“ par conpleàni, matrimoni, batèzimi e altri momenti inportanti par noi comuni mortài. No scrivi el preso, no ze elegante, ma ze un'idea: no saremo Donald e Melania...ma se cualchedun volesi invitarne...dizemo a'l matromonio? Cosa, ghe dizemo de no? Ti schersi? Anca noi faremo el sito: "Marieta e Nineta con voi"...a preso modico, se intendi, ma podesi andar ben anca un do galine, cualche litro de ojo de oliva, un fia' de parsutel, do lugànighe...roba de caza...noi se contentemo, semo de boca bona e de poche preteze.

Ah ma in dute ste notìsie ze anca un adio, cuel de'l prìncipe Filipo, consorte de la regina Elizabeta, che ga lasà 'sto mondo a 99 ani. Cualchedun ga dito: 99 ani e 73 pasi a far la bela vita senpre do pasi drio de la regina. Cativeriozi, invidiozi e anca malinji, cualcosa de bon gavarà fato 'sto omo de bel aspeto e de bela prezensa, ansi. La gente ga portà tanti fiori e, con sorpreza, go visto anca cualche bicer de nero. Ti vedi? El prìncipe no solo gaveva gusto ma anca el saveva che el nero fa bon sàngue e zlonga la vita.

Ah, la nobiltà. Chisà l'efeto che fa naser nobili...no credo che in 'sta vita lo savaremo mai. Ti savevi cuela de la contesa che spetava i fioi? I conti? E l'amica ghe domanda: Parchè no i torna? / Eh no, dizi la contesa, no i torna più. / Alora la ghe ne fasi altri. / Ma figurite, ghe ne go fati do, no poso rifar i conti. / Ah, ghe rispondi l'amica, e cosa fa de bel i sui fioi? / e la contessa: I cori, ze i famosi conti corenti..." La go sentida de Benigni, e la divido volentieri con ti...la funsiona de „Tirimesù“...che se el conto corente no ghe bati a la contesa, figurite el nostro...el ze proprio scanpà a gambe levade.        Pian pianin te saludarò, ma dime prima, come va co i tui lavori de ristruturasiòn? Sa che go leto che in Italia, inte i pici paezini cuazi dismentigài, i vendi caze par un euro? Chi le conpra se inpenja a rimeterle in sesto ma intano i ga la caza, ansi, te lo digo con le parole che go sièlto par ogi: copo e scuro,  i ga el copo su la testa, par dir che i ga dove star, e un giorno, se spera lontan, i dividarà i scuri tra i fiòi, par dir che a onji fio ghe tocarà „el scuro“ un toco de caza.

Anca noi gavemo tanti de cuei paezini par l'Istria con caze dirocade che con un colpo de bora le sparirà. Demoghe la posibilità ai nostri zovani de sistemarse, chi che pol che le vendi par poco njente, dopo ben suòceri, consuòceri, forsi anca le banche, son sicura che duti metarà cualcosa par jutar i fioi a sistemar la caza. Sta nostra zoventù za scanpa parchè no trova lavor, che scanpi anca parchè no ga dove star vol dir proprio invitarli a andar via. Chi pol, chi ga le man in pasta, chi ga la parola che decidi, che fasi un opera pìa...

Ciao stela e che dute 'ste parole no te fasi dizmentigar che in frigo de'l bareto gavemo le nostre robe che ne speta.

Te saludo, ah, ti savevi che el 13 de 'sto meze jera la giornada internasional de'l bazo? Fiapa la sarà pasada, in 'sto perìodo ormai no se baza più nisun, o cuazi. Ma noi se li mandemo lo steso, parchè de lontan se pol! Bazi alora, mile mile e ancora de più... 

 

 

Nineta, cuor mio...ma sa che ghe stago pensando duta la setimana? Dopo che ti te ga meso su'l vizo cuela famoza crema a baze de ojo e cafè no ti me ga mandà njanca una foto! No ze che la te ga fato iritasion o te ga cascà un toco de ganàsa e no ti vol dirme? Spero de no! Mi no me gavesi fidà...ma ti ti son un toco de pan...Ara spero solo che ti staghi ben, mandime una foto cusì ti me rasicuri.

Bela mia dona, lavoro, lavoro ecòme! Cua se ga serà par regiòni e noi in Istria gavemo le terase de i bar verte. Ti ga visto l'"efeto Pàscua" ah...inte le altre regioni? "E vai coi numeri!" In Croasia cala el PIL ma el Covid zvola! Bum!...prevedibile come i cali dopo un balo con le scarpe nove! Viva le riunioni de fameja! Viva la fameja!

Te digo solo do robe ligade al Covid e dopo stago sita. No so se ti ga visto o sentù, ma cua ze suceso un mezo cazin tra el ministro de le finanse e cuel de la sanità...Beata politica...El primo, Marić, povero, no'l saveva che i ze in direta su Youtube (che el ghe la conti a mia nona!) e el ga atacà Beroš...

Deso, mi no so se lo ga fato par eser più popolare, no so se el vol ciapar voti e sinpatìe...ma una domanda giusta la ga fata: "Come ze che in 'sto ano de Covid ga aumentà i costi de medicine e sanità se ze stadi sài meno interventi e savemo benisimo che tanti malài che gaveva bizonjo de cure no le ga avude parché i ospedài no i li acetava?" Bela domanda, no te par? E no gavaremo mai una risposta...parché la risposta ze stada un'altra domanda de parte de  Beroš: "Come mai che el piano de riforma de la sanità che ze sta prezentà ze mezi che nisun lo varda?"

E alora anca mi go una domanda: "Ma perché cavolo continuè a far piani e riforme che no sta né in ciel né in tera?"...Scuzeme, bei mii politici, ma no se pol ciapar de ezenpio una Nasion che ga la sanità che funsiona e far un bel "copia e incola" e aplicarla cua de noi?" Copiemo parfin i vestiti de i mercatini cinezi; in gastronomia ghe metemo nomi stupidi, storpiandoli, a i cibi; copiemo edifici e  monumenti a i architeti e scultori famozi...ma Santa Paletta: podemo copiar el sistema sanitario de cualchidun che lo ga mejo de noi?...

Canbio tema, Nineta...riguardo a'l sior tacamaco...ze la mentalità ocidental che no val. Cua de noi i ansiàni no i vien considerài, ze una categoria mesa de parte, parchegiada, par che no i gabi più niente de dar, de ofrir...invese in Giapon ze senplicemente "persone" che ga oportunità e sicuro no vien tratade de "serie B" ma viste come risorse! A propozito de pensionati, Plenki ghe ga promeso un bonus Covid in baze a le pensioni che i ciapa...entro aprile! Pleeenkiii...ara che te tenjo de ocio! Cavoli, in periodo de elesioni i prometesi anca de risusitar i morti! Ti vedarà, la prosima setimana i ghe prometi caze de oro a i teremotài, vile con pisina a i barboni, lavor par i zoveni e...e volevo dir una roba ma la podesi eser volgare e no la digo!

Le caze a poco preso par i zoveni, che bela idea Nineta...utopista! Cua ze "le caze a preso stelare par i foresti"...parchè pensar a i zoveni? Cua duti serca de guadanjar e ti trovi inte le agensìe ruderi che sta par crolar al preso de un apartamento in centro cità...parché adeso i te vendi la trancuilità, el silensio...E un che vien de fora, metemo un ingleze che vivi a Londra, ghe par un afaron...invese el se ga ciapà una fregadura. No...no frega duti, ma tanti sì!

E frega che te frega, ti ga ragion: Nineta, fata la ze, femo come Trump e Melania: verzemo el sito web par farse invitar a matrimoni, batìzi e cuel che ti vol! Con la crizi che ze va ben anca vèje e funerài! "Forsa siori pronteve a prenotarne: ridemo, pianzemo, sparemo monade a l'ocorensa. Par un panin e un bicer de vin ve cantemo anca la mesa! E portemo a spaso el can se servi!" Verzemo anca un profilo Instagram e diventemo "influènser"...cos'te par? No sarìa mal.

Te digo ancora una roba che me ga fato star mal e dopo giuro che tazo. El cazo de Erdogan che no ghe ga dà la sedia a la Von der Leyen tajandola fora de i discorsi e zminuìndo l'autrevolezza e la sua carica de presidente...e ela se ga sentà sul divano, in parte. Ma che Erdogan se conporti cusì se saveva, i podeva spetarselo...ma che el Presidente de'l Consiglio europeo no gabi fato una piega e se gabi sentà su la sedia...eco, cuel me ga fato venjir su un nervozo che lo gavesi spacà in due! La ga scarigada come un saco de patate fasendoghe capir che in fondo, anca in Europa, no semo tanto lontan de'l medioevo e che le done conta poco o niente. E a difenderla no ga avudo el coragio njanca la Merkel...tropi afari, tropi soldi in balo con la Turchia par dir una parola...E duti a far finta de njente. El presidente Draghi se ga dà fora, el ga condanà el gesto: l'Italia no ga interesi economici con la Turchia: lui pol eser omo!

Che tristesa Nineta, che ràbia, che pochezza.

Cua de noi ze le elesioni fra poco...i partiti sta candidando done, done brave, conpetenti, preparade...mai tante done come 'sto ano! E mi me domando: le candidè parché i mas'ci sta perdendo credibilità? Le candidè par darle in pasto a i lupi? Le candidè parché le ze par vero valide o parché le ghe ga meso la facia e no le ga paura? Opur le candidè in un periodo cusì dificile parché se cualcosa va mal ze più facile, secondo voi...ma no ze dito...scarigarle?

Mi spero che no le candidè par strategia politica ma parché le val per vero! E spero anca che se le se trovarà a eser obligade a star su un divano, tirarè finalmente fora i atributi, ve alsarè de cuela maledeta sedia e su cuel divano se sentarè anche voi, de fianco de lore!...e no le lasarè sole!

La mia parola de ogi, Nineta? "Deluzion" de'l mondo, de le persone, un poco de duto...

Ciao cuor...e mandime una foto che vedo se con la "crema fata in caza ojo e cafè" ti son bela come senpre o ti te ga trasformà in Donatella Versace!

Baziiiiiiiiiii!

 

 

 

 

 

Programe Hrvatskoga radija slušajte na svojim pametnim telefonima i tabletima preko aplikacija za iOS, Android i Huawei.