El coragio de domandar scusa, che bela roba!!!...

Nineta počinje zagrljajem Marieti...jer je jednostavno voli kao osoba. Kaže kako su riječi bitne, kako bi ljudi trebali dobro razmisliti prije nego ih izgovore...ali nije tako. Marieta kritizira ponašanje političara i elita na Bandićevom pogrebu...

Marieta mia bela, un strucon...cusì, parchè te vojo ben, e bona domeniga, anca se semo za dopopranso e meza la ze za pasada ma fina mezanote senpre domeniga ze.

       Ogi scominsio a contartela cusì (me son studiada anca le lingue par contartela ben): me dispiazi, sorry, desolé...ma prego, la se imagini, no ze de che, ma ghe par....e invese ze de che e me par ecome! Parchè le parole deve sier pezade prima de dirle, altrimenti le ze come un boomerang e indrio ti pol spetarte de duto. De cosa parlo? Deso te conto duto.

       El presidente dela Serbia, Vučić el ga 'vu la brilante idea de tocar, criticar, maltratar uno de i nostri giojèi de fameja: la malvazìa istriana, e sa cosa che el ga dito? Intanto che ze un vin de pèsima qualità, l'agetivo che el ga uzà ze „odvratno“, che la tradusiòn dovesi sièr, credo: "vomitevole, stomigoso, dizgustozo", un vin che nisun pol bèvar e che i vini serbi ze sài mejoooo."

E sicome noi no stemo sentài a petinar le pupe, pronte ze rivade le risposte de'l sìndaco de Pola che lo ga invità in Istria per imparar cualcosa su 'sto nostro vin prelibato (ze parole sue), e a brindar co un bicer de malvazìa a la libertà de pensièr...e la risposta anca de'l diretor de Vinakoper che rispetando la libertà de dir la sua che ga onjidun...el ga dito che el ghe spedirà una casa de malvazìa co'l gentil invito a vizitar la cantina a Capodistria, che, la go vista e credime, la ze notèvole. Ghe vol dir che Vučić se ga scuzà...co dute le bele parole de'l cazo, dizèndo anca che a lu la malvazìa pròprio no ghe piàzi.

       Ma omo mio, no ze problemi, con duti i vinài che gavemo e i vini straboni che i ofri, no'l gavarà che l'imbaraso de la sièlta. Bon, inportante che el se gabi scuzà, parchè cuèsta la jera tropo grosa, a mio modesto parer e spero anca a parer tuo, Marieta. Parché dita tra noi, che se ne intendemo (e che no semo inbriaghele ma…bongustàie!), la malvazìa no ze solo uno de i nostri vini più boni, ma la parla, la parla de i nostri valori, de le nostre tradisiòn, de la nostra cultura, de la stòria de duti noi che semo istriani, sensa dir che tanti serbi che pasa cua le vacanse se la bevi con duti i gusti.

       A proposito de domandar scuza, sa che i giaponezi ga una vera e propria règola par farlo?...se ciama "saikerei"e uza el corpo, te spiego come, alora: par un zgarbo picio i fa un picio inchino, giusto  picio picio ...

Par un zgaro più serio la schena i la piega ben e i tien i oci basi e par mi cuesto ze un senjo de sotomision, e, par farse perdonar una colpa grave i deve inzenociàrse ai pìe del a persona che i ga ofezo. E cuando no i ghe la fa a riconoser de verla fata proprio sai grosa sa cosa che fa i fioi de'l Sol Levante? I se servi del presiòzo aiuto de le agensie de publiche scuze, con tanto de profesionisti de'l „me dispiàzi, scusa“ che i lo fa a pagamento. Se trata de veri e propri attori in grado de pianzer lagrime de sàngue par conto tersi.

Cosa ti pensi Marieta, saria un ideùtsa? Meter su un agensia de pianti a pagamento, no saria mal, ah? Tanto mi, più che va vanti i ani, ti me mostri el deo e piànzo gratis, figurite se i me pagasi, lagrime grose come sarièze. 

       Volevo domandarte, Marieta, te piazesi far un bel viageto con vacin conprezo? Nema problema, cuesta sarà la nova frontièra de le vacanse a i tenpi de'l Covid. In Inghiltera ezisti un club privato che ghe permeti a i soci, pagando un iscrision anuàl de sirca vintiòto mila euri de andar con l'oroplan a Dubai opur in India par farse vacinar. Chi che fa parte de 'sto club deve solo prenotar un jet privato, rivar su'l posto dove che i ciapa la prima doze de'l vacin e dopo i speta in un hotel de 4000 stele con piscìne a cascate, coghi privati, masagi, saloni de belesa....e no so ancora cosa, i speta dizevo che pasi le setimane par ciapar la seconda doze. Parlemo de „zan zan“ par no dir soldi? Alora, el vacin rientra inte i vintiòtomila euri pagai par l'iscrision a la vacansa, invese par el viagio in prima clase e par el sogiorno ti devi metar ancora 45 mila euri. E cusì con la modica cifra de cuazi 70 mila euri...Come dir, manca i vacini? e che problema ze...pago e...(no vojo dir parolase). Cusì ze la vita, stela mia, el mondo ze fato a scale, c'e' chi scende e c' e' chi sale, chi va a i monti chi va al mare e chi va in...ghe laso la rima a chi che vol completar 'ste cuatro righe.

       Marieta, la stagion de i spàrizi ze cua...un maseto co i ovi, ah? E co' ti vadi a colèzerli, me racomando, el primo spàrizo che ti trovi mànjighe la testa, cusì par duta la stagion le vipere no te beca, ansi, le scanparà.

Ti ga notà che semo in te l'ano de la V: alora la parola, ansi le parole de ogi ze Virus, Variante,Vacin...e mi ghe taco ancora Vitoria e...

Viva noi!!!!

Ciao stela, e me racomando cuela malvazìa che ti ga ciapà in regalo ...tràtila ben.

Un strucon e mile baziiiiiii!

Nineta mia, ti sa che no me ne intendo tanto de vin...mi te poso solo dir che a mi el me fa mal e buto fora anca le bile...ma son un cazo unico in Istria almeno penso...El fato che Vučić se gabi scuzà me par un gesto dovudo...xe che no go capido soto l'efeto de che sostansa che el jera co' el ga rivà dir dute cuele cavolade su la malvazìa...mah...forsi ghe ga dà in testa cualche trapeta de tropo...

       Su'l model giaponeze invese podessimo metar su una dita de scuze con ti che ti pianzi par vero e mi che te procuro i clienti...vara, comincio de'l Parlamento e vado verso el baso! Se femo i miliardi, Nineta! Imagina che anca cua de noi se gavesi dute 'ste cerimònie par le scuze in baze a la gravità...de noi i agiungesi anca l'opsion "striscia sull'asfalto a faccia in giù"...porca mizèria, gavèsimo le strade piene de zente distirada!!!...no se rivasi più guidar!

       Restando su'l tema de l'educasiòn, Nineta, ti te ga acorto che mi e ti no gavemo paura de dirse che se volemo ben e se mandemo bazi e struconi a piène man? El dirse che se volemo ben par noi ze cusì spontàneo e normale...tanto cuanto a i altri ghe ze normale e spontàneo volerse mal e no dirselo...E no capiso parché la zente ga paura de'l ben e ga inparà invese a conviver in paze co'l mal. Vara che semo propio un rasa stramba! Sicuro che ze più fàsile voler mal che voler ben...ma a sièljer senpre la via più fàsile uno dopo un poco se stufa, no?...se vedi de no...

       In cuanto a viageti...e me piazesi sì viagiar...e so anca dove che volesi andar...njente de pretensiozo, un 4 giorni de paze lontan de duti me li ciolesi...Però, ah, Nineta, 70 mila euri tra cuòta, viageto e vacin...beh, convien! Cos' ti vol che sìa 70 mila euri par noi? Bazecole! Cuesto ze senplicemente "el costo de la vita", parché ghe gavemo dado un prèso a la vita, la gavemo ridota a scambio e compravendita. La vita se la conpremo, e onjidun in baze a i soldi che ga. Par cuesto ze chi che pol permeterse de andar in un ospedal, de eser curado, salvado...e chi che mori sensa che njanca rivi l'anbulansa..."No ze schèi...ciao bei!"

Forsi no gavemo capì tanto ben cosa ze la vita. Ma semo stupidi...e gavemo ezatamente cuel che costruìmo...o distruzemo...

       Canbiando argomento, l'altra setimana no te go njanca domandà se te ga piàso Sanremo, forsi parché fato sensa pùblico, cuazi sotovoze el ze pasà come un refolo de siròco...njanca de bora. Chi che me ga entuziazmà a mi? Orieta Berti, una sinjora, intonada, inpecàbile e inbrabada al punto giusto. La ga rivà farse becar de la polisìa dopo el coprifuòco, alagar la camera de l'hotel e dichiarar che la volesi cantar co i Naziskin...zbaljando el nome de cuei che a la fine ga vinto. La ze un mito, la Berti ze un mito! La ze rivada nona...e in che altro posto la podeva rivar? La ze nona!...la podesi eser nona de tanti cantanti de Sanremo!

       Ah, e l'altra setimana no go njanca volù comentar el funeral de Bandić, paze a l'anima sua. No poso dir njente de lu, no lo conosevo. Però, però, però...bèi mii ipocriti che al funeral ghe se' andài...ma no ve vergonjè? Cuei che dovesi dar l'ezenpio, cuei che gavesi dovù proibir e blocar un asenbramento de'l genere...tuti là, fracanjài come sardine in scatola! Ou! E me tirè anca fora la casàda che venjarà verta un'inchiesta par capir se ghe jera de le iregolarità? Ma pensè che semo ciechi? Ma la gavè finida de ciorne pe'l cul? Ze persone che no ga njanca podù asister al funeral de la propria mare, de'l proprio pare...e voi fe' i pajàsi e gavè la facia de bronzo, e sparè monade sensa far una piega?! Ma savè che in una Nasion civile, cuèi come voi dà le dimisioni?...sì che lo savè, ma cuesto no ze un Paèze civile, la Croàsia...ma l'Istria forsi sì, ze civile e un povero diretor de un ginàzio de Pola se ga scuzà co i studenti parché no i pol far lesiòn in maniera normale, no i pol andar in gita, no i pol organizar njente, no i se pol incontrar...lu ze civile. E voi, lasù, intocabili autoelèti a Dio se permete de cior in giro la zente!...con tanto de menefreghizmo e sorizeto de mone...tanto savè che no ve sucedarà njente, tanto savè che la giustìsia no ze uguale par duti...savè che la gavarè vinta voi...me domando fina a cuando...

       No la go co duti i politici, Nineta, cualchidun se salva 'sta setimana, Miletić par ezenpio (e chi che ghe vol mal no me interesa),  Miletić se salva par la maniera elegante de come el ga risposto su l'affaire malvazìa e su'l fato che el ga dito che l'Istria ga dimostrà de poder tenjir soto controlo la situasion...e de continuar a insister su un apròcio regional de le mizure...Ah, Miletić mio...se i te scoltasi...ma no i te scoltarà...no ghe convien, ansi, i ne mandarà tanti de cuèi covidozi par farne creser i numer e dir che semo come i altri...ti vedarà!

       Sa Nineta, mi in bareto vedo la zente mògia mògia e se no gavesi de lavorarghe no ghe andasi ancora. Go inparà a goder de la natura e de'l silènsio in 'sto perìodo, a cior un bon libro in man, a beverme un the in terasa co i gati vardando le cince tra i rami de'l nespolo...no me mancava la zente. Me mancavo mi.

       Te laso co una parola che par mi ze la più inportante: "sièlta"...noi sièlzemo la nostra vita, no ste pensar che nisun ve obliga a viver come che no volèsivo, solo che par sièlzer ghe vol gaver coragio, saver ingiotir rospi, ciaparse le conseguènse de duto e gaver le spale forti...sai forti...ma dopo, credeme: ze duto un altro viver!

       Ciao mio cuor, te vojo ben anca mi, tanto, tanto, tanto che visìn la malvazìa e el moscato te tenjo in frigo anca un botilja de teran...che el vin nero fa ben par la presion e dà morbin...almeno cussì i dizi!

Ciao, Nineta! Baziiiiiiiiii!