Hrvatski radio

Radio Pula

La sindrome de i calci in culo...

23.05.2021.

20:04

Autor: Tomislav Šikić

La sindrome de i calci in culo...

La sindrome de i calci in culo...

Foto: - / -

Nineta je zabrinuta jer je primila cjepivo. Sve se polako otvara, ali ima "sindrom kolibe" što znači da ne želi napustiti kuću. Marieta je zabrinuta jer cjepivo sigurno nije puno koristilo Nineti: stalno čisti, ima fobiju od pauka... možda je bolje da posjeti liječnika.

Marieta cuor mio, son preocupada. Adeso che le robe va mejo, che i bareti funsiona, le boteghe ze verte, la gente se movi, mi me sento come una cusasènera. Go paura de gaver „la sindrome della capanna“, ti ga sentù parlar de 'sto, ciamemolo, disturbo? Sarìa el teror de andar fora de caza, eco, cuèl. Go cuèl. Me sento sicura solo tra 'sti cuatro muri...Spero che no sìa grave, cosa ti pensi, dovesi andar de'l dotor? Andar...e chi va? Par andar dovesi andar fora...njente, speto ancora un fia', speto che me pasi, intanto stago caza e za che son, neto. Faso le pulisìe. Neto su'l neto. Paso cuzina, mobili, divani, cuàdri, lampadàrio...mio marì...duto co'l savon de marsilja, che me naza de bon, o con savon al limon o ai fiori de montanja, basta che me nazi ben. Par el banjo solo varechina, parchè dizinfeta. Sa che netando go trovà de i pici ragneti che me dà un fastìdio, i me fa senso...pensa se co' dormo de note magari i me va inte la recia o inte'l nazo...pol capitar! So so, za te sento che ti dirà „solo a ti te pol capitar...“...ma lasa star, la precausiàn no ze mai tropa. Go leto che ai ranji no ghe piazi l'odor forte de la menta e che fasendo anca in caza una losiòn con estrato de menta e sprusàndola inte i cantoni i scanpa fora...però, pensàndoghe ben ranjo porta guadanjo, e alora? Come la metemo? Sarìa come butar i soldi fora de la finestra...e in 'sto perìodo de magra no ze un bel afar...Njente, me li tenjo, li òdio tanto i me fa ribreso, ma, sa come che se dizi: l'amor e l'odio ze do corni de la stesa cavra e a noi ne servi la cavra...

       Ze za un per de volte che te volevo domandar (ma dopo tra una roba e l'altra me dizmentigo senpre)...a ti, te ga capità che cualche turista te fermi par informasion su che strada ciapar par andar avanti co'l viagio?...sa che proprio go la cosiènsa sporca e onji tanto ghe dèdico un pensier a dute cuèle persone che me gà domandà informasion stradal e spero che un giorno i me pardonarà parchè no so dove che li go mandài. No go el senso de l'orientamento, me perdo int'un bicer de acua e invese de dirghe „No so“ o magari “no son de cuà“...par far la gentile ghe digo avanti a destra po' el gira, ghe pararà de tornar indrìo ma lei vadi senpre vanti par cuèla strada...E me vien anca de rider parchè onji volta che me capita 'ste robe me ricordo un libro de l'amico Roberto , ma me par che jera anca un film dove ghe jera 'sto cartel stradal con la scrita de do cita' italiane, mi par semplificar dirò  do nostre, dizemo Umago - Pola. Eco imagina un cartel stradal dove scrivi Umago – Pola 94 km meno 10. Meno 10, come mai? Ma parchè invese de scriver 84 i ga sbaglià e scrito 94 e par no rifar el cartel i lo ga completà con un "meno 10". E uno se domanda: ma alora come so cuàndo rivo a Pola? Senplice, cuàndo su'l cartel scrivi solo meno 10. Ah gioia mia? La te par conplicada ma la ze lisa come l'ojo...e mi la me diverti sai. La me sa un fia' de humor istrian!

       Come cuèla che co' ghe go domandà al mio vizin a Buroli dove che trovo un siòr che gavevo de domandarghe una roba el me ga risposto: "Là, là de la bianca porta!" Bela mia Istria...

       Ma ti ga leto le ultime notìsie? Paresi che el posto in Croasia dove se vivi mejo de duto ze proprio in Istria, e tra le cità cuèla dove se sta ben che mai, ze Parenso. El Comun pensa a i soldi par i asili, a i stipendi par l'istrusion, i sovensiòna indùstria, sport, cultura, sanità e in general duto cuèl che servi par miljorar la qualità de la vita, e  ancora i ze sài bravi par ciapar i fondi europei, che no ze tanto fàsile, ghe vol un fraco de documentasion. No me la go inventada, la go leta su internet. Stela mia, go una pensata genial: trovite el mulo de Parenso, ara, ze come far un bon investimento, ti vadi sul sicuro! So, ti me ga za fulminà co i oci. Bon, dismentiga, ma onji tanto...pensighe che Nineta tua te vol solo de'l ben.

       Senti, tanto par saltar de pal in frasca ma se vojo contarte tante robe no me resta che far cusì, alora volevo dirte che 'deso che in tanti se vacina, che se scomìnsia a vedar una luce de speransa ti trovi ancora senpre i bastian contrari. Ma ti sa che un partito cua in Slovenia ga organizà una coleta de firme, fina deso i ghe ne gavarà anca più de 3000,  co la proposta de sostenjir e tutelar i contari al vacin però che i gabi lo steso verte dute le porte sensa nisuna discriminasion. Mah, mah, mah, me par che obligatorio no ze proprio njente, onjidun se conporta secondo la sua cosiènsa...e credo che mai come in 'sto momento gavemo bizonjo de cosiènse che capisi  cuàl ze el paso giusto par tirarse fora de 'sto buzo nero. E visto che se sta riscominsiàndo a verzer duto, mi sugerirìa de tenjir ben in memòria i giorni de'l 2020 parchè el ris'cio de dizmentigarlo e de tornar cuèl che jerimo prima ze, e ne conpanjarà ancora par un bel toco de strada...no volesi che i fasi la canson „la ripartensa sa, ze come el vento...“ Dopo, più in là, magari tra cualche ano, se la contaremo. Inportante eserghe...

       Prima de saludarte vojo farghe le congratulasion a duti i nostri  vicesindaci che ze pasai a le aministrative de domeniga e congratulasion a la nostra nova vicepresidente de la Region Istriana, Jessica Acquavita, una speransa par duti i nostri giovani che con ela, son sicura, i rivarà a gaver de le bele aperture de oportunità, parchè mi me domando: posibile che per i nostri giovani studiài, preparài, volonterozi, sia inposibile diventar protagonisti de tante nostre realtà? 

Te laso cuor, ogi con una batuda: "Zvolarò, ga dito el bruco. Duti ga tacà rider, trane la farfala..."

Bona setimana e come senpre, mile baziiiii

 

Nina mia...ti son sicura che el vacin te gabi fato ben? Nina, ara che me stago preocupando...capiso la "sindrome della capanna"...un uzèl che ze stà in cheba par tanto tenpo no'l se ricorda più come che se zvola e el stenta anca a trovarse de manjar...e son contenta che ti lavi tu' marì co'l savon de marsilja...ansi...te sugerìso, par no copar i ranji (e te lo digo mi che son aracnofobica...) te digo che, par vìa che no i te saldi 'doso co' ti dormi, visto che ti ga dito che a i ranji no ghe piazi i odori forti...lavite ti co'l savon de marsilja (o no lavarte che ze ancora pezo) e tu' marì daghe solo che el se lavi con àcua tiepidina...cusì i ranji va tuti su de lu e ti son salva! Te par una bona idèa? A mi sì! Però me stago preocupando sa par come ti te conporti...no ze sài normale, Nina...vate far vèder de un dotor...

       Nina...e in cuànto a l'orientamento...go prezente come che ti son...ze oramài...cuànto ga pasà...do ani fa, par andar de Buie a Montona  ti me ga fato far cuèl giro par Pòrtole e zo verso Livade, ma no contenta gavemo prolungà par Gràdinje e semo venjude fora che jerimo cuàzi Santo Stefano...Nina...

Eco, cuòr mìo, come te lo digo?...co' un turista te domanda cuàlcosa, fa do mostrèsi co' le man e fa finta de eser muta che ze mejo...Za me li vedo 'sti poveri Cristi che par andar de Capodistria a Bertochi ti li mandi a Mugia via Ancaràn par farli girar su par Skofije...

Nina, ti son perfeta cusì come che ti son...ara, no servi che ti fa finta de gaver orientamento...ti solo tazi che cualchedun ti pol ancòra salvarlo, va ben?

Però par una roba ti podesi eser ùtile! Con la voja de omi par caza che go...femo cusì, nina, za che ti ga de trovarme el morozo, la prosima volta ti me porti ti a Parenso ah?...no rivemo più!...ha ha ha...

       Nineta, ti ga mensionà le elesioni e anca mi ghe faso i augùri a duti...Ma par la stòria infinìda...tra poco se trona a votar...'sti balotagi no far che prolungar l'agonìa...e 'deso scatarà coalisiòni, cortelade, promese tra partiti...altro che secondo giro: secondo giron de l'Inferno e via Dante che rodola inte la tomba! Ma sa cos'che me ga fato rider tantisimo in 'sti giorni? Cuèi che cuàndo che jera un solo candidato i ghe scriveva:"In boca a'l lupo!"...ma chi doveva vinser? Lui o se steso? Ma chi? Ma cuèsti no ga capì un tubo!

       Ah, Nina, l'altra setimana go dovù star sita...ma Nina, Nina, Nineta mia...el Stožer Nasionàl...ma su mare grega...no se pol far laboratori e corsi par i fiòi, i putèi ze ancora mezi online, le famèje s'ciopa e lu cosa ga dito l'altra setimana? "Va ben, tuto a posto: confini spalancài e sensa tampon par chi che vièn votar!" Ma semo mati, omo? Ma secondo lu, duti cuèi che jera in cuèle file chilometriche ze andài a votar? E dove i ga votà? A Tirana?...vista la percentuàl de eletori che se ga prezentà a i segi?!!

       Povero noi, Nineta, altro che "sindrome della capanna" cuà ghe volesi una "sindrome de i calci in culo"! Ma dime ti...e dopo i dizi: "Eh, el Stožer nasional perdi credibilità..." Credibilità? Oramài el ga perso la facia mile volte, ma che credibilità?!! Ma in che man semo? I pareva cusì seri co' ga scominsiò duto 'sto tran-tran...e vardili 'deso, parché che ze le elesioni ghe ciapa a momenti la "sindrome de: Mi son Dio!"

       A propòzito de Dio...cuèsta te la devo contar...e la ze vera, sa? Un mio amico ze sta invità a una crèzima...una crèzima, una comuniòn...no so...a Zagabria. Bon, armado de dizinfetante e mascherine, lu e la fameja se prezenta davanti la ceza...e no ze nisun...strano, epur no i jera tanto in anticipo. El se varda intorno e fora no ze altoparlanti...mah...El vedi rivar senpre più gente: niente mascherine, distansa zero...Par farla curta, jera duti dentro fracanjài e lori no se ga fidà 'sti mii amici...e co' i ze andài dopo in bareto...dove che anca i jera duta la zente fracanjada...i li ga vardài, lori, con mascherine ecetera ecetera e un ghe ga dito, cuàzi ridendo: "Istriani?" e sto mio amico se ga solo alsà in pìe e el ga dito: "Sì"...beh, co' i lo ga visto, groso come un armadio nisun ga dito più njente...ma sa cuàla che ze la roba bela? Che el ze boznjaco...ma el se senti istrian e lo dizi a testa alta! E cuèsto me ga fato una piaser!

       Nina, te digo ancora cuèsta e te laso. Una roba bela, Nina...Venerdi son andada a una mostra...a parte el posto belisimo, la Tore de San Martin a Buie...che vistaaa! I ga verto la mostra de un fotografo conasional de Fiume, Rino Gropuzzo...Nina, che foto! Dute babe e bele!...e interesante che le ga mese in ambienti dirocài: l'ex sucherificio de Fiume, l'ex cartiera de Fiume, l'ex torcio de Buie...duto ex! La vita dentro ruderi che l'omo ga fato e ga decizo de abandonar...E po' ghe jera, Nina, de i ritrati de una dona più bela de l'altra...

Ti vedi? Ti vedi Nineta mia? Mi no go la "sindrome de la gabia"...mi son come el tuo bruco che ga voja de diventar farfala e de zvolar...

       E ogi te laso co i grili...i grili che ga comincià a cantar soto la  finestra e finalmente i porta l'estate...e saria ora! Mi son stufa de 'sta piova!

Cuor, se sentimo presto...baziiiiiii!

      

 

 

 

 

 

Programe Hrvatskoga radija slušajte na svojim pametnim telefonima i tabletima preko aplikacija za iOS, Android i Huawei.