Hrvatski radio

Radio Pula

Le bele storie no devi finir mai…

16.05.2021.

18:19

Autor: Tomislav Šikić

Le bele storie no devi finir mai…

Le bele storie no devi finir mai…

Foto: - / -

Nineta, razmišlja o životu koji do četrdesetih godina prolazi polako, a zatim ubrzava i prebrzo prolazi... Marieta se prisjeća kako je je išla na ples popodne u hrvatsku školu...Tko zna kako bi djeca danas reagirala kad bi tri sata bila bez mobitela i otišla na ples kao nekada...

»Pronto? Parlo con luni? Bon, con lunedì, che de fin che ti son, ara! Cuà domèniga. Senti caro, doman no cori che ti venji, ciòte un giorno de ripozo che noi zlonghemo el nostro...«

Ah? Marieta? Ti te ricordi co' de luni se andava a lavorar duti zbatùi fasendo za piani par el fine setimana che gaveva de venjir?...Come che cànbia le robe, 'deso preghemo de andar a lavorar e semo contenti che rivi luni e che se verzi duto cuel che se pol, più che se pol...e prometemo che saremo bravi, mascherine, distanse, duto cuel che ti vol, basta che torni la nostra vita de prima...anca se ghe volarà ancora tanta santa pasiènsa.

Ga ragion cuèl che dizeva che la vita no ze spetar che pasi la tanpesta, ma inparar a balar soto la piòva...e noi a balar soto la piòva semo pronti.

A propòzito de balar, ah Marieta mia, cuànto me piazeva mi andar a balar. Me ricordo che co' jèrimo sinjorinete mi e le mie amiche andàimo i sabi a balar in palestra de'l ginàzio croato a Buie. Jera duti i ginaziài, i inteletuài, (par itenderse, cuèi che par dir una parolasa i dizeva 3,14, el famoso P...greco) e rivava però anca ragaseti de i paèzi torno che za lavorava, mecànici, contadini, carpentieri...e ti li distinguèvi subito sa parché? Parché i gaveva duti el fondo de la braga serà co'l ciapin che se meti sugar la roba. I rivava in bicicleta e parìa che la braga no ghe se incastri inte i ragi de le rode i la fermava cusì. Però, cuèi sì che jera balerini, altroché, i te faseva girar come una farfala...e onji tanto me invitava a balar uno che mi ciamavo „pompa de solfato“, parché el gaveva senpre el movimento de la man come se el ghe dasi el solfato a le vide. Ma lu saveva che lo ciamo cusì e el se faseva una bela ridada. Bèi tenpi amica mia, bèi tenpi...Chisà dove che i ze 'deso, chisà come che sta duta 'sta bela mularìa de la nostra „mejo gioventù“...digo nostra par modo de dir, parché ti ti son ancora fiòla...

Chisà parché prima de i trenta, me vojo zlargar, anca prima de i cuaranta ani la vita par che no pasi mai, forsi parché gavemo traguàrdi, aspirasion, che no vedemo l'ora de realizar: una vita bela, conpleta, madura...el traguardo che ne speta...dopo invese, che più tardi che el riva mejo ze, el va zvelto, anca tropo par i mii gusti. Cusì la ze, su de rato se va pian, ma zo de rato, bela mia, se cori anca tropo. Mare mia, me par de sièr mia nona co' la partiva co'l...“me ricordo“ e mi giravo le bale de i oci...spero che no ti le giri anca ti...ma onji tanto ricordar cualcosa de bel fa solo ben a l'anima.

Marietina mia, come va con le tue pasegiade? Sa che uno de i ultimi giorni de sol, parché cua co la piova onji do par tre paresi che anca la primavera sìa in cuarantena, te dizevo uno de i ultimi giorni de sol son andada inte'l boscheto cua sora par abrasar i alberi che porta ben a la psiche e anca al fìzico. 'Sto giro go scoperto che porta anca altro. Me go carigà de formìgole cuèle rose, maledete, che anca ponzi. Inte i cavei, zo par la schena, fina inte le mudande...con duto el rispeto par la natura, ma le go frachinjade come i pedoci, s'cik s'cik tra le onge...parché no ah, cuel che ze tropo ze tropo. Mi vado là piena de amor, me serco l'albero giusto, me lo abraso e lu me mola 'sto patafon, ma no ze de far, no se fa...

Natura, mi capiso che anca ti no ti ghe ne pol più, ma un fia' de cuèl che se dizi almeno par chi che te ama...no molarme la formìgola rosa, e njanca la cola, e njanca i ranjeti...parché senò venjarà l'Uniòn Europèa e te sistemarà formìgole e ranji come che ga fato co i vermi de la farina, bei grandi, giali, sugài e mesi in piàto come „cibo del futuro“. Parché 'sti vermi suti, intièri o in polvere, paresi che i sìa un spuntin rico de proteìne e che come gusto ghe somèi a i pistaci. Altroché parsuto, panseta, lugànighe, solo bestioline, bestioline vàrie, formìgole compreze, che ze una alimentasion sài sana, rica de vitamine, de fibre, de minerài... Marieta, con cuèsti e l'aria de l'altra volta gavemo risolto el problema de'l manjar e anca a costo contenjù, ansi, se i vermi suti se li femo in caza, dirìa gratis.

Marieta, mi vòjo ricordar un aniversàrio che me par sai inportante e giusto darghe risalto e valor, penso a i 50 ani de TV Capodistria, festegiài la prima setimana de magio. Se ti pensi, 50 ani ze un bel traguardo, ti pol ezibirlo come una garansìa, una garansìa de solidità par duta l'esperiènsa fata in 'sti ani, par la capacità de tenjir duro con dute le dificoltà (e no poche) incontrade strada fasendo, par gaver afrontà con inpenjo le sfide de le tecnologìe senpre più avansate. Nei ani Tv Capodistria ga otenjù i sui bei sucesi gràsie a i dipendenti, (perché la tv come dute le aziènde ze fata de persone, de la loro esperiènsa), dipendenti de jeri e de ogi che la ga copanjada inte'l suo percorso. E vojo ricordar l'intraprendensa de cuesta tv che pena nata 50 ani fa ga meso in onda el primo telegiornale con due persone: un omo e una dona, digo, una dona, cuando le done se limitava a'l sorizo de la „bonasera“. Mi, che go vù la fortuna de scriver insieme a lori cualche pagina de 'sta longa storia, ricordo una scuadra bela, forte, eficente, piena de entuziazmo, una scuàdra che jera un concentrà de istriani: chi rivava de Fiume, chi de Pola, chi de Rovigno, chi de Parenzo, chi de Umago, altri de Buie...E credo che de dirito cuèsto aniversario, come duti i aniversari de le nostre istitusion, sìa un suceso e un orgolio par duta la nostra minoransa. E ogi te vojo saludar no con una parola, ma con una fraze, dedicada proprio a Tv Capodistria: “Le bele storie no devi finir mai“...

Ciao cuor, e come senpre mile mile mile baziii...

 

Ma bela la mia Nineta! 50 ani? TV Capodistria ga zà 50 ani, par vero? Cavoli! Mi me ricordo che de fiòi vardavo senpre Grizù, el dragheto che viveva in cuèla palude de petrolio...o pece...E lu che gaveva el pare famozo par le sue fiamade, el voleva far el ponpier...e el ghe ne conbinava de duti i colori! E dopo se vardava senpre el telegiornale, che come ti dizi ti jera a l'avanguardia par la giornalista dona e non solo, ma anca parché ne dava notisie de'l mondo e fina a l'Italia de'l centro-sud ghe contava de noialtri. E ti te ricordi i ani '80/'90? Co' Berlusconi la ga fata diventar el suo "canal sportivo"? E daghe con le direte de duti i sport, e mio papà tacà su'l televizor...come adeso de'l resto...

Nineta, co' ti me ga da' 'sta notìsia son subito corsa su Youtube e pensa che go trovado un filmato de'l 1974 con un'anunciatrice che te somèja de mati! Nina, la ze uguale de ti, spudada! E elegante, come ti! Che ti gabi una sòzia...o ti me scondi cualcosa? Ma va' saver, ti ti son un mistero vivente!

E sa ancora cos'che me ricordo ancora de TV Capodistria? Le publicità! Jera cuèle tipo disenjo animado...cuèle de le creme, no me ricordo de che roba...vere e proprie storiele...njanca a colori, ma tipo de do colori, me ricordo el roza parché el roza mi no me piàzi...un poco zbiadìde...E po' la sigla de'l senjal, cuèla sì che me la ricordo! Con cuèla statua de'l putel che sona el pifero, che gira...Che bei ricordi! Grasie, Nina mia!

E in cuànto a le bestioline de zgranociar...devo confesarte che le chapulines, che ze una specie de pice cavalete...beh, mi le go manjade...e te poso dir che le ze anca bone! Una mia amica mesicana gaveva un ristorante e mi con la conpanìa jerimo là più o meno dute le sere a ciacolar, bèver cualcòsa su'l mureto...e ela se faseva spedir 'ste cavalete de'l Mèsico e la ne le dava come...come che se dà i kikiriki...bone le jera! Tostade e salade...e po' no te par de manjar cavalete, no ghe se vedi le satìne, i oceti...par par vero kikiriki. Beh, Estèr o Tetè, cussì se ciama 'sta mula, no se faseva mandar solo cavalete de'l Mesico ma anca el Mezcal, cuèl bon, originale...che sarìa una tequila co'l vermo...Eco, una sera, par zbaljo me go manjà anca el vermo...ma de cuèl no...no go bèi ricordi...cuèl me ga fato un poco schifo a dir el vero...el jera duto come de goma, pièn de alcol...Vabè, lasemo perder...

Des'che ti parli de'l ginàzio de Buie...mi no andavo là a i bali, ma a scola croata, de dopopranso...e stavo pensando: imagina che a i fiòi de ogi ghe se cavi par tre ore el celulare e ghe se organizi un balo come cuèi che andavo mi insoma o che ti andavi ti...chisà come che i se conportasi, ah?...chisà se i spetasi cuèl famozo "lento" par strucarse o i se scondesi drio i cantoni bar bazarse...chisà cosa che sucedesi?...Ti dizi che solo i se anojasi? Pol darse...ma mi ghe provasi lo steso...Tipo esperimento sociale ma anca par darghe a lori una bota de vita poveri fioi, no?

Nina, no te domando se ti son andada votar parché in Slovenia ogi no se vota...ma mi 'sta matina son andada votar...e ze ancora tenpo par chi che no lo ga fato! Ara, NIna, no vedo l'ora de saver chi che ga vinto! E no vedo l'ora che finalmente pasi 'ste elesioni parché mi me piazi parlar de politica...o mejo parlarghe un pochetin a i politici e rabiarme con lori...E po', Nina mia, go leto tante de cuèle promese in 'sto ultimo periodo che no ghe ne poso più! Promese e monade naturalmente!

Adeso sarò un poco volgare, ma ciàpila in rider, insoma no ze volgare in verità, ze una vecia batuda...Insoma a parte el slogan: "Figa per tutti!" i le ga sparade dute! Orco tocio, chi vinsi vinsi cuà inte i prosimi cuàtro ani svolemo come i sateliti de Elon Musk!...uuuh, li go visti sa? Me go dismentigà de dirte l'altra volta! Cavoli! Pensa che mona che son, pensavo che jera UFO...e jero contenta anca! E go pensà "Cuà...yuhuuu...semo cuà...venjì zo a far un poco de ordine su 'sta Tera che va remengo, per favor!"...macché, me go fato la figura de pirla co i amici...jera una costelasiòn de sateliti, 60, duti in fila, precizi e perfeti! I faseva inpresiòn...jera infinita 'sta roba...Ga durà minuti el pasagio e la mia speransa...E co' go capido, grasie a Google, cosa che stavo vardando me ga ciapà una tristesa...Nina: 60 enormi scovase che naviga inte'l ciel...60!!! Come se no ghe ne fusi za abastansa robe che no c'entraniente lasù, che co' ti vardi le stele ze  duto un mòverse che par le formighe rose che ti contavi prima...Nina, ma dove stemo andando a finir? Ma parché lanciar 60 sateliti co' no semo più in grado njanca de vardar la Luna, l'unico nostro meraviljozo satelite natural...

Ah, ecote la parola de ogi: "natural"...che ze come dir:"raro" ogidì. Noi se rifemo de plastica, lancemo sateliti artificiali, vivemo in mondi virtuali, se vedemo in bidimensionale...ma no semo stufi de duto cuèsto? De "eser finti"? No semo stufi de no viver par vero?...mi sì...e deso vara, a costo de trovar un nido de formighe rose, vado anca mi a abraciar un albero...e no fa niente se piovi, me banjarò, ma chi se ne frega, me banjarò...de piova, natural...e me sugarò co' rivarò caza contenta de gaverme stacado de 'sti maledeti schermi che ne asorbi la vita, la vita vera, cuèla vera!

Ciao cuor, ah...mi ancora niente vacin...senò venjivo za a trovarte!!!...con la botilja frescaaa...

Baziiiiiii!

 

 

Programe Hrvatskoga radija slušajte na svojim pametnim telefonima i tabletima preko aplikacija za iOS, Android i Huawei.