Hrvatski radio

Radio Pula

Le Ciacolone: "L'ogi ze el nostro tenpo...e Dante"

17.01.2021.

16:43

Autor: Tomislav Šikić

Le Ciacolone: "L'ogi ze el nostro tenpo...e Dante"

Le Ciacolone: "L'ogi ze el nostro tenpo...e Dante"

Foto: - / -

Bez kredita se ne može ništa u životu: Nineta se prisjeća kako je jednom uzela velik kredit za koji su joj rekli da ga neće preživjeti, ali je ona uspjela sve otplatiti. Marieta se preselila u mali apartman i ne nalazi ništa jer su joj sve stvari po raznim kutijama…a kupila je sve iste.

Marieta brava, brava parchè ti ga fato proprio ben a cior el credito, l'unico modo par noi „brizni“ de rivar far cualche lavor in caza sensa meterghe ani. Anca mi, ani fa go fato un bel puf sostansiòzo che me ga cuazi sconcuasà la vita, ma pian pianin se riva anca a tornarli. Sicuro, ghe vol strènzer, ma tanto par noi no ze una novità, semo bituai a strenzer za de pici...i ne tira su „strenzendo“...Mia nona dizeva senpre: "Co i soldi no se conpra njente de importante: no la salute, no l'amor, no l'amicìsia, e njanca la serenità. Se conpra l'invidia de i altri, cuesta sì, a tonelate."

E alora  viva i crediti!!! Chi la vita se la suda se la godi de più...

Sa, co go ciolto mi el credito un mio amico me ga dito „Ti ti son mata, e coragiozi chi che te lo ga da, visto che no ti son più de primo pel...“ Povero mona, el pensava che tirarò i crachi prima de pagarlo...e invese la ze andada ben, go fato i lavori e anca deso me li godo...E po', imparemo  un fia' de san otimizmo de i triestini, come i dizi lori? „Par i debiti no i ne inpica, la forca no i ne da...mandeghe la lista al diavolo...“ Che gantsi, senpre pieni de morbin! Beati lori.

Noi invese me par che viagemo sempre co'l fren a man tirà...anca i oceti li gavemo fiapi...deso che co la scuza de le mascherine se vedi solo cuei...in giro no se ghe ne vedi de alegri...ti te son acorta anca ti? E ti ga visto  che scominsiemo duti a somejarse? Sì, parchè duti gavemo le rece a sventola...l'astico de le mascherine ne le tira cusì che le ze come le vele, ocio fiapo e rece a zventola, no semo proprio un bel veder...mah, passarà anca cuesta!

Ghe vol tenpo, tenpo, beato tenpo...sa, onji tanto penso: "Ma chisà che giorno che sarà dizemo el 17 genaio del 2300. Femo finta che sia una domèniga. Eco, nisun de duti i miliardi de persone che ze in 'sto momento su la tera vedarà cuela domèniga, nè Marieta, nè Nineta, ne i fioi che nasi ogi, doman o dopodoman o fra dièze ani. Ti vedi, semo provizori ma cuesto no ne fa star mal, come no stemo mal parchè no gavemo visto dizemo una domèniga de'l 1300... Mi diria che noi no semo in anticipo e njanca in ritardo...semo inte'l nostro tenpo, par destin o par cazo, come che ti vol. Ogi ze cusì e doman se vedarà. E cua ghe sta ben la famoza batuda:“ Domani è un altro giorno.“ Ormai la ga fato storia. Anca se devo dir che mi me piazeva anca cuelaltra: „Francamente me ne infìschio“...In onji cazo dovemo pensar che ze senpre cualcosa de bel che ne speta.

Cosa volevo contarte ancora...Ah, sa che 'sto ano ze setesento ani che Dante ze morto...Ma dime ti, parchè se ricorda le ricorense de la morte o no cuele de la nasita? Mi me par che saria mejo dir: “In 'sto giorno el ze nato“...pitosto che: “in 'sto giorno el ze morto“...come dir el se ga cavà de torno, par no dir cualcosa altro...Bon lasemo star, jera un mio pensier. Fato stà che in ocazion de 'sta ricorensa l'Accademia della Crusca ga pensà un progeto  e i publicarà 365 parole (che po' sarìa una parola al giorno) dedicade a la sua opera, a la Divina Commedia...i dizi che ze cuesto un bel modo par rileger e anca aprofondir l'eredità linguistica che el ne ga lasà. Se ti vol te legio le parole de la prima setimana de genaio...e se no ti vol te le legio lo steso parchè ze cultura: alora: trasumar /  color che son sospesi / bella persona / dolenti note / tin tin /  mirra / cricchi e...l'8 genaio, che po' ze el giorno del mio compleano, sa che parola che i ga meso?...eco, no vojo sier zbocada ma...Merda!!! Proprio cusì, cosa ti dighi, la me portarà ben? In ogni caso ze una citasion colta e se la trova do volte inte la Divina Commedia. Lori ga ciolto cuela che el ga uzà inte l'Inferno, la che el ga ficà i rufiàni, i sedutori e adulatori...scolta: „ E mentre ch' io là giù con l'occhio cerco, vidi un col capo sì di merda lordo, che non parea s'era laico o cherco“...

Caro Dante...ti pensa se el vivesi ogi no'l gavesi che l'imbaraso de la sielta...Bon, duto cuesto par dirte che 'ste robe no ze che le so cusì, ma go studià e me son preparada...e go anca una bona pensata che spero te andarà ben.

Scoltime mi. Se l'Accademia della Crusca meti una parola al giorno par Dante...noi, che co'l nostro meravigiozo dialeto podemo solo che vantarse...no digo una parola al giorno, ma una a la domèniga podèsimo meterla, una mi e una ti...dime che ti son d'acordo.... ecco, la mia de ogi ze SILELE...che po' saria le caramele fate in caza co'l suchero scuajà...cusì meto cuesta parchè la me ricorda i giorni più bei...cuando anca se la sabia scotava noi se ne fregàimo parchè tanto savèimo che stàimo corendo verso el mar. Eco, bel saria gaver de novo  cuela legeresa...

Ciao stela, fa bei lavori in caza ma te prego no trascurar el bareto, anca se el ze ancora serà onji tanto daghe un'ariegiàda e controla che le nostre robete no manchi...come senpre bazi a ufete...

 

Nineta mia, "chi la vita se la suda se la godi de più"...che moto de speransa, bel! Ma anca godèrsela sudando meno no sarìa mal...No digo no far njente, ma eco, rucando un ninìn de meno...poco poco.      Credito su e credito zo, deso che me son trasferida in 'sto apartamentin me par de eser insenpiada! Me zvejo de note come se fusi caza mia e in scuro vado verso el muro invese che verso la porta par andar in gabineto e me zbato la testa! E la matina...za no son cusì zgaja mi de matina...che camino come un bradipo in coma...insoma, la matina no so dove che go calse e mudande. Ze duto inscatolà e mi insenpiada go ciolto dute le scatole uguali! Ghe meto una vita a capir dove che go la roba!

Le mascherine? Cuele le trovo senpre, ormai le go picade par duto, le go inte le scarsele, in machina, inte le borse...ah, e par mi che go le rece a zventola ze una goduria! Finalmente me sento uguale come duti i altri! Ze come gaver ritrovado la fameja!!!

Nineta, ma ti manji pan e filozofìa ultimamente? Bela la riflesion che "semo inte'l nostro tenpo", cuel giusto...Ti ga ragion, sa? E par fortuna! Mi za me vedo...inte la preistoria sicuro me manjava un dinozauro, Medio Evo i me bruzava in piàsa, Rinascimento forsi forsi me la cavavo...E al tenpo de Rossella O'Hara, beh...anca là gavesi ris'cià parchè mi no gavesi fato diferensa tra neri, bianchi, grigi o piturai e un tiro de s'ciopo in schena el me sarìa rivà de sicuro! Cuàzi cuàzi preferiso l'ogi, ti ga ragion. Viver dove e come vivo no ze tanto mal...

Nineta, Dante che vivi al giorno de ogi? E no'l gavesi cosa scriver povero Cristo! Inferno, Purgatorio e Paradizo...Paradizo un poco meno a dir la verità...li trovemo onji giorno su'l giornal! E chi el metesi dove? Co i nostri politici, i ladroni, la zente che copa, trufa e inbroja...l'Inferno sarìa stracàrigo de zente, in Purgatòrio cuatro gati e in Paradizo do che gioga a carte! Ara, par fortuna che el ze morto, senò ogi el faseva el portapizze e no gavèsimo vu' njanca una riga de la Divina Commedia! E normale che se celebra la morte! Cuela i la senjava, magari su una lapide ma la jera...ma la nàscita? Come i faseva a saver cuando che uno ze nato se fin che i rivava a un pàroco pasava giorni o setimane e njanca la mare no se ricordava più che giorno che jera nato el picio! Su le lapidi infati ti trovi: Nato boh!

Brava Nineta, femo anca noi un omagio al nostro dialeto! Bela cuela de una parola onji domèniga! A mi par dir la verità SILELE me fa anca venjir in mente mio papà che me dizeva:"Se no ti te cavi de davanti el televizor te riva una silela!"...che saria come dir un stramuzon...

La mia parola invese ze...ze...ze...SORANOME, eco, ghe ne parlavo giusto jeri che una volta dute le famèje, almeno inte i paèzi più pici come el mio, onji famèja gaveva el soranome. Jera tanta zente co'l steso conjome e par distinguer chi jera de chi, ghe se meteva e se tramandava 'sto belisimo soranome ciapando o de una carateristica fizica de la persona, o de'l caratere...De parte de mama, bujeze, mi son Paolati, e de parte de mio papà che ze de Vila Cociani son Kùketi...pensa ti...Radize perse...pecà...

A Chioggia i ga i soranomi scriti su la carta de identità, pensa ti! I continua la tradision, invese noi la gavemo butada in scovàse come un calseton zbuzà, cuazi che no gavesi importansa saver de dove che uno vien...cosa el ze nato...

Dona mia, sa cos' che te digo? Volevo porconar anca ogi su ingiustisie e politica ma no lo farò, no...Me tenjo pitosto 'sta bela sensasion alegra e de nostalgia che go dentro...

E chi se ne frega ogi se casca el Governo in Italia e Conte gioga a colorar le Regioni; se cua de noi el Governo par el Muppet Show e i ze senpre più injoranti e falsi e i frega anca el morto; ma chi se ne frega de Trump e la sua folìa...anca se no volesi mai che el struchi el famozo boton de le bonbe nucleari...Ma chi se ne frega!

E ti ga ragion, devo pensar al bareto, che fusi che fusi la volta bona in marso lo verzemo de novo! Sa cos' che te digo? Ma sì, che 'sta domèniga la vadi cusì...dizendolo a la triestina, za che ti li ga citài: "E viva l'A e po bon!" butemola in valser ogi! Ti me ga dà una bona idea, vado in bar a controlar che le nostre scorte de liquori no sia andade de mal!...e par farlo ghe darò cualche zluc! E te pensarò!

Ciao cuor! Se sentimo presto! Vado a pìe che ze mejo...che per andar vado…ma penso che tornar, torno balando…Ciao, cuor!

Programe Hrvatskoga radija slušajte na svojim pametnim telefonima i tabletima preko aplikacija za iOS, Android i Huawei.