Hrvatski radio

Radio Pula

16:13 / 10.01.2021.

Autor: Tomislav Šikić

Marieta e Nineta: "Siora Befana...e la banca magica"...

Marieta e Nineta: "Siora Befana...e la banca magica"...

Marieta e Nineta: "Siora Befana...e la banca magica"...

Foto: - / -

Nineta se pita kamo ide Marieta u ovo doba: pandemija, zima...a ona? Boh! Glavno je da nakon 10 dana svi još čestitaju svima Novu Godinu...a ona se nada da će Nova godina, prema pjesmi Giannija Rodarija, biti onakvom kakvom je načine ljudi...

Domèniga, Marieta mia, domèniga...che bel, a 'sta giornada ghe vojo ben parchè so che, anca se lontane, saremo insieme...come ti staghi? Ben, cosa njanca domando, indafarada a trazlocar...ma dove ti vadi anima mia, co 'sto caos che ze in giro, co 'sto fredo...co 'sta piova, co 'sto vento...“chi è che bussa a 'sto convento?“ Lasa star cuesta ze un'altra storia...onji tanto perdo colpi!!! ma cusì, par far la rima la andava ben.

Ah, Marieta cara, 'sti auguri de Bon Anno Novo no finisi mai...e Bon Ano Novo de cua, Bon Ano Novo de là...ma sa cosa? Mi me bastasi anca uno za uszà, de seconda man, uno de cuèi de cuando se stava mejo, co la nostra beata libertà de viver come che ne par, de andar e de venjir sensa permesi, sensa tamponi e cuarantene...

In 'sto ano pena pasà gavemo ricordà i sento ani de la nàsita de Gianni  Rodari e  me ricordo che de picia gavevo imparà una sua poezìa, ti vol che te la digo? Si dai:  Indovinami, indovino / tu che leggi nel destino / l'Anno Nuovo, come sarà? / Bello, brutto o metà e metà. / Trovo stampato nei miei libroni / che avrà di certo quattro stagioni / dodici mesi, ciascun al suo posto / e il giorno dopo il lunedì / sarà sempre un martedì. / Di più per ora scritto non trovo / nel destino dell'Annno Nuovo / per il resto anche quest'anno / sarà come gli uomini lo fanno.

Ecco, ti ga visto, anca lu ga dito che ze i omini che lo fa, e mai come in 'sto periodo cuesta ze una verità granda parchè noi pensemo che co 'sto Covid el pezo sia pasà, ma invese me par che el sia andà a ciamar rinforsi...Volesi dedicarghe un pensier a duti cuei che no porta la mascherina, o che il la meti a la „come tu mi vuoi“ co'l nazo fora..."Cari ragasi, pensè se, dopo de cuesta, el mondo venjisi colpì de una pandemia de virus intestinal e che dovesimo duti, e digo duti, meter el panolon...(e co 'sto virus che canbia no ze de dir do volte...) che nostalgia che gavesimo de la mascherina! Alora metemola e no stemo far monade, che in giro ghe ne ze za bastansa...

Za che son volesi profitar par saludar una siòra che ze pasada cualche giorno fa e che la se ga manjà el Capodano, la ga bruzà S. Stefano, la ga distudà el Nadal, la ga lasà un fraco de carbon e a duti cualche chilo in più, ciao siora Befana, co' jero picia no te volevo ben parchè ti portavi via dute le feste...ma cresendo go visto che se somejemo senpre de più...e allora, tanto val rasegnarse...Te spetemo st'altro ano. E tiènte in forma almeno ti!  Marieta anca ti la Befana te ga lasà cualche chilo in più? A parte che el te stasi solo che ben...Sa go leto che cuel che juta par tenjir el pezo forma  ze la dieta mediteranea e no solo, paresi anca che la slonghi la vita de 9 ani. Chisà, forsi sarà bale ma verdure, njente friti, ojo de oliva e pese no ghe ga mai fato mal a nisun...Sì, so che el pese costa, ma no cori zlargarse co i scanpi, caramài e sfoje...sardele, zgombri, pese azuro, roba povera...ma bona par le vene, par el cuor e par la scarsela!!!

E co 'sto tenpo che, mai come deso, zvola, ze importante star ben. Ti ga mai pensà cuanto valor ga el nostro tenpo? Par farne capir cual ze el suo valor, una volta un mio profesor el ga dito: "Provemo far un ziògo: imaginemo che onji matina cuando se zvejemo i ne daghi otantasiemilaquatrosento euro co la sola clàuzola de spenderli duti in giornada, cuel che no se spendi co' se va a dormir el te vien ciolto. Però 'sto ziogo pol finir de un momento l'altro. Cosa c'entra dire voi? C'entra si'. Cuesta ze la nostra banca magica, la gavemo duti e la se ciama Tenpo. Onji matina gavemo 86.400 secondi par la giornada e cuando de sera se indorminsemo no ze riporti par el giorno drio, el tenpo che no gavemo visù, se perdi, diventa jeri, diventa pasà. E onji matina 'sta magia riscominsia, però 'sto giogo ga una regola, 'sta banca magica ne pol blocar el conto in onji momento, sensa preavizo.  Par cuesto dovemo saver apresar el nostro tempo...anca el milèzimo de secondo; pensa a un sportivo che par un milèzimo de secondo perdi la medàja de oro...La vita ze magica, alora profitemo de onji secondo.'' 

Ancora deso, dopo tanti ani, poso dirghe solo che gràsie a 'sto mio profesor, par le bele parole, el bel insenjamento.

Marieta, profitemo de'l nostro tenpo, serchemo de star contente par cuel che gavemo...e se ne ciapa el fotìo, fèmoselo pasar...che anca cuèi secondi de rabiadura i ne fa solo che mal.

Tezoro mio, te saludo. Speto senpre el nostro giro par l'Istria, intanto, se ti son d'acordo, podesimo farse un bel itinerario...me piazesi andar anca a S. Fosca dove ze una bazìlica, e i dizi che ze el teren che ga, no so come spiegar, ma cualcosa che fa ben al corpo...

Cosa volevo dirte ancora?...ah sì, volevo prezentarte i sete nani de'l dopopranso: Frùtolo, Dòlciolo, Cafèolo, Amàrolo, Sparèchiolo, Abiòcolo e....Divànolo.

Vado de Divànolo....ciao gioia......

 

Nineta mia, dove vado, dove vado...mi son pezo de Fantozzi...Sa parchè go trazloca? Alora...gavevo comincià le pratiche in banca par un alsar credito par far un do lavori de bizonjo in caza a marso de l'ano scorso...co' no jera ancora né pandemìa né niente...e beato tenpizmo de la Croasia, deso che son sensa lavor e ze crizi nera i me lo ga dà...e ti vol che lo rifiuto, dopo mezi che conbato? Eh, no cara mia, magari manjo pan e acua ma i lavori me li faso! Cusì che me go trasferì par el momento int'un picio apartamentin che i me ga inprestà...Oh, Dio, cualcosa pago...in nero par fortuna senò me venjisi sai de più. Beati i Stati che fa legi sensa senso e meti tase inutili e tropo alte e ne meti in condisiòn, a noi poveri dizgrasiài de doverli fregar!

Comùncue me rangio, sa?...vado netar par le caze, stiro ai sinjori, me par de eser tornada a 50 ani fa: servi, noi, senpre servi! Ma almeno no rubo e go la cosiensa a posto.

E po'...Nineta, son fortunada. Vara duta la povera zente che continua a tremarghe la tera soto i pìe. No i ga più una caza, no i ga più njente...i domanda un poca de giarìna par no caminar inte'l fango...E i ze minaciài anca de i fiumi che se sta ingrosando...Cuèi, cuèle persone bizonja jutar. I li ga za fregai 25 ani fa, co i ghe ga fato le caze sensa cemento, cavandoghe el materiàl, rubandoghe anca la dinjità. E deso de novo...de novo in strada. Ma par fortuna duta la Croasia se ga zvejà. Ze partidi ajuti de onji dove. E tanto de capel a duti i serbi, a i abitanti de la Serbia che ga dito "Basta, finimola co la politica! Ze gente, semo gente! Jutaremo anca noi!"...e anca lo Stato serbo ga mandà ajuti...Che fusi l'ora che se zvejemo duti e capimo che cuel che jera i ani '90...jera i ani '90? Che fusi l'ora che le persone e el bonsenso vinsi par una volta su l'odio? Nineta mia, sarò anca mona: ma mi ghe credo!

E so che adeso cualchidun me criticarà par cuel che go dito...ma se i me critica vol dir che no i ga capido njente! Semo zente...dovemo jutar altra zente...No spetarè miga che una balenotera azura che nuda inte l'Oceano Pacifico venji a salvarve co' gavè bizonjo?...eco, cuesto volevo dir! 

Nineta mia, se proprio Rodari dovesi gaver ragion, e "l'anno sarà come gli uomini lo fanno"...beh...spero che "gli uomini" sia cuei che go apena mensionà, cuei che fa de'l ben e meti de parte l'odio parché se seguimo l'ezènpio de i Americani...vara, l'ano andarà benisimo!

Ma ti ga visto che cazin in America? E duto parché l'omo co'l canarin morto in testa ga ciapà ancora più ale e no ghe sta a perder! Par che el gioghi a un macabro Riziko...Feridi, 4 morti, zente calpestada...irusiòn in Campidoglio? E lu? Twitta...ma i lo ga blocà par fotuna! Lu, co cuel muz de mona, co la fàcia de bronzo, fa el finto tonto e manda mesagini! Mi no go mai credù e mai credarò che in America ze la democrasìa parché un Stato che te lasa morir se ti son povero e no te cura, no sarà mai democratico. Ecoli, i se ga dà fora par cuel che i ze: primitivi, buzuri e sensa cultura!

Ma dime ti se cuel ze un presidente! Un fioleto visià che gioga co la vita de le persone...altro che Caza Bianca...a Guantanamo lo serasi mi...e in izolamento! Mare mia che mondo!

Par fortuna bel mio cuor, ti me ga canbià l'umor co le parole de'l tuo profesor...Cavoli...le parole de'l tuo profesor me ga colpì...proprio una zberla me ga tirà. Ze cuel che serco de far: rucar, no fermarme mai, no lanjarme mai...contentarme senpre...e credo che semo in tanti a sièr cusì...no solo mi. "La banca magica che pol blocar el conto in onji momento...", no se ghe pensa, ma ze cusì...e onji momento ze inportante...Grasie Nineta, grasie cuor...

Ah, par finir in belesa canbio tema e te digo che son d'acordo co ti: Ma che ghe venjisi un scagoto, ma de cuei potenti, altro che panolon, co un ninsiòl i dovesi ligarse, a duti cuei che no ga ancora capì un tubo de 'sta pandemia!

Nineta! E no domandarme se la Befana me ga portà cualcosa e se go cualche chilo in più, che se l'ano scorso almeno nazavo de i piati de i altri, 'sto ano no poso njanca cuel parché i ga chiuzo i ristoranti! Ma che chilo ti vol che gabi butà su? E co cosa? Pan e acua?

Ah...mi no go i nani par saludarte...ma go una feta de pandoro vansà! Sa cosa? Deso me ciogo un bel bicer de acua de spina e me manjo un tochetin co tuti i gusti...sercando su Google come se riva a Santa Fosca...Cos'ti dizi? No go de manjar ma go internet? Sicuro...me son tacada su cuel de'l vizin!   

Ciao cuor...se sentimo presto...