Slovenia e Croasia...fioleti visiadi...

Posvuda vlada kaos: u Zagrebu prosvjeduju zbog posla, u Kopru zbog škole, u Italiji je pala Vlada... Žene prijavljuju seksualno zlostavljanje posvuda po Europi...pandemija je u tijeku. U svemu tome Nineta se ne prepoznaje u ogledalu i kaže svim ženama da moraju brinuti o sebi.

Cara Marieta...no, femo cusì: Marieta mia cara, me par più confidensial...alora, Marieta mia cara che bruto momento che stemo vivendo: a Zagàbria gente che protesta in piàsa par poder tornar a lavorar, par poder parlar co'l governo, a Capodistria cortèi de protesta de genitori e fiòi contro le scole serade, in Italia casca el governo, in altri posti i sta in pìe par miracolo...par pasar el confin co la Croàsia e Slovenia dèmoghe de tampon, paresi che la Slovenia concedi 12 ore sensa ma la Croasia no, se go capì ben, parchè la notìsia la me pareva sài confuza...o son mi che son confuza e me perdo par strada...e po' cuela de le ex studentese e de le atrici che ga denuncià le violense  sesual che le ga dovù subir  par poder finir la scola, par poder lavorar...da parte persone schifose, odiose, corote, che no ze denje njanca de sièr nominade...voze de done che se ga alsà no solo a Belgrado, come ti me contavi, ma anca a Sarajevo, Zagabria, Lubiana...Che bruta roba Marieta, penso che ze una de le robe più brute che te posi tocar, e dover star anca site parchè magari nisun te credi, la tua parola contro cuela de un'autorità...Mia nona diria: »Deghe la polverina che no el ghe funsioni più...« Mi sarìa più cativa: »Tajemo...la famoza Bobbit insenja...« (un fato capità ani fa, no so se ti te ricordi...la ga dà un bel tajo proprio là). Dute 'ste robe, anima mia me buta zo, son triste, par tirarme su me canto una vecia canson de Gaber...»Signora la sento avvilita / Signora sta su con la vita / e' sempre azzurro il cielo / è sempre in fiore il melo...« ma no ze che iuti sai. Te faso una confidensa: stamatina jero proprio fiapa, co le baterie scàrighe. Parchè? Parchè me go visto in specio e credime, nisun conosi una dona tanto ben cuanto el suo specio: i cavei a la „come tu mi vuoi“, sotooci, palidusa, un completin de flanela lontan de onji tentasiòn. Ti ga prezente „Ti lasci andare“ de Aznavour?...eco, el spetacolo jera cuel, me mancava solo le calse a pindolon. E no, go dito, ogi che sento Marieta devo sier come una pupa (par modo de dir) e alora, me ga ciapà el borès e me go lispà: lavà i cavei, fata la frizura, un fia' de roseto, de matita su l'ocio e…mejo, devo dir sai mejo. E tra le righe cuesto volesi sier anca un mesagio par dute noi done che a forsa de star a caza fasemo de'l pigiama, de la tuta e de'l divano el nostro caval de batalja. E no ragase, 'sta situasion strana che stemo vivendo no ne devi imbrutir e anca se semo cuazi duto el giorno in cuzina no ne devi calar l'autostima e onji tanto, co' ne cala la palpebra, ricordemose de darse una scorlada parchè pol capitar che la parte più bela de noi se depòziti su'l fondo…e dopo magari chi che ne sta visin no ne varda più co i stesi oci...de prima, cuei de l'amor par intènderse. A cuesto proprozito te conto cuesta, cusì come che me la ricordo, alora: »Beatrice jera una ragasa cualsiasi morta a Firense setesento ani fa, rinpianta de pochi e cuazi sconosuda. Ma par Dante che la amava jera una dona de Paradizo, un sinbolo de perfesion. Se Dante la gavesi spozada el suo nome in te la Divina Commedia, co'l pifero che lo gavesimo visto, come che no gavemo visto cuel de Gemma Donati che jera la molje de'l poeta  e la mama de i sui tre fiòi. Ah, ma no ze l'unico. Una situasion cusì se ripeti anca co un altro poeta, el Petrarca co la sua famoza Laura...(che ga spozà un altro che la ga fato nove fioi) ma no el ga mai dà njanca un senjo de la ezistensa  de la dona che ghe ga dà do fioi.  Cosa volevo dirte co cuesto? Che parfina do omi cusì grandi e sensibili no i ga savù scanpar a la regoleta comun de idolatrar le robe che no se otien e de zvalutar cuele che se ga!!!

Ti vedi? L'erba del visin ze senpre più verde...la ze vecia come el cuco, ma sempre atuàl.

'Sta setimana che vien, el 10 gavaremo el Giorno del ricordo. Sì, son d'acordo co dute le robe che ti ga dito...ma sa, no poso far a meno de pensar che anca la mia famèja pensava de andar...li sentivo parlar de sera, co' noi fioi no dovèimo scoltar...in Italia, anca in America...jera za i ani '60...e credo che no i ga mai trovà el coragio de moverse... Imagina se sarìa suceso, mi ogi no sarìa la stesa. Serte situasion, sensasion no le gavaria mai provade. Tante persone no le gavaria mai incontrade...njanca ti. Duto somà va ben cusì. Va ben parchè penso che njente sucedi par cazo, e che se la vita ga decizo la via...che sia.

Ciao dolcesa mia, ti onji tanto ariègia el bareto che se va vanti cusì forsi forsi ti podarà vèrzer...magari tavolini fora ma intanto se lavora!

Te laso la parola de ogi, go pensà a „pinjata“, ma una pinjata granda, un pinjaton, parchè o ben o mal, mai come deso, ghe semo duti drento...

Se sentimo domeniga...un strucon. Ah, me racomando, domeniga sarà el cuatòrdize, la giornada de i inamorai...speto che ti me conti duto...ma duto duto...

 

Cara la mia Nineta...te rispondo a do robe bele che ti ga dito...che za de'l tono de la voze ti me senti cuanto che son incavolada!

       Ma Nineta mia bela...se Beatrice e Laura gavesi cedù, noi no gavesimo njanca una riga scrita. Ze el tormento che spenzi i poeti, el dolor, el star mal...più che i patisi più i scrivi, se sa, no?

Imagina che al terso apuntamento Beatrice ghe gabi dito a Dante: "Bel mio guelfo, va ben, ghe stago! Venjo in ezìlio co ti e saremo felici e contenti!"...e via lori! Nineta, ma se ti gavesi una fìa, ti ghe dasi Dante come morozo? "Mama, te prezento Dante, ze un cocolo putel, per zbaljo i lo ga condanà par baraterìa, frode, falsità, dolo, malìzia, pratiche estorsive, proventi illeciti e pederastia...ma no ze colpa sua sa mama?" Ti ghe credesi o ti ghe diria: "Picia mia lasa perder che de 'sto cua no pol venjir fora njente de bon! Su, via, via, via...va in ca,era Beatrice" Senplice, no? Ti la chiudesi in caza fina che el "cocolo putel" no i lo mandasi el più lontan posibile.

       E normale che Dante dopo, patindo e patindo, sercando 'sta Crista par mar, par tera, Inferno, Purgatorio e Paradiso el ga scrito cuel che el ga scrito. Su' molje ghe jera tacada e magari la lo criticava e tormentava onji giorno...me stupìso che no la sia mensionada inte'l giron de i "rompibale cuotidiani"...solo cuel, vara!

 

     E restando in tema epico cavalersco...l'Italia, ma fìa mia, ma Nineta mia, l'Italia par un romanzo fantasy...Conte che no se aspeta Draghi che se lo manja in un bocon...se riva un Ministro Principesa vojo veder se i lo meti in una tore par farlo liberar de'l Cavalier Berlusconi...Dio mio che circo! Speremo ben ah...una fiaba i ze!

 

       Ah...Nineta, grasie de'l consiljo de farme bela par sentirme mejo, ma de 'sti tenpi par sentirme mejo gavesi solo bizonjo de conprarme un cararmato, un tenk...grando, ma de cuei veri, bel grando, co'l canon!...e savesi anca dove puntarlo, pensa! Uuuh...cuanti posti!

 

       E sì Nineta, ti gavevi capido ben cos'che voleva la Slovenia, ma dopo la Slovenia ga cambià idea e ga dito che i transfrontalieri gavarà bizonjo anca lori de'l tampon par andar lavorar e intanto i ga creado el caos par duto, co la zente che no ga podù andar lavorar i ospedai co i telefoni intazài par le miliaja de telefonade de zente in panico, le fameje disperade...ma ma ma ma, dopo i ga ricanbià idea!...e alora i tamponi par i transfrontalieri no servi più...Ah, Nineta, ma lori i ze pieni de sorpreze, ma chisà cos'che i se inventa doman!

       Cuel che me conforta ze che i stesi zloveni ghe dà de'l ridicolo a 'sto Governo zloven...Ma cosa no ghe xe ciaro a Janša e conpania bela?

Va ben, cari zloveni, ve lo spiego mi, spero de farme capir: alora, se de voi l'incidensa del Covid in percentuale ze de'l 19,6% e de noi de'l 10,6%, chi devi tutelarse de chi? No ze dificile, ze matematica, e badè ben che mi no son njanca brava in matematica e ghe son rivada savè...ma ghe riva anca uno de tersa elementare se ze par cuel...

       Se no gavè capì ve digo cuesto che capirè (spero): Slovenia e Croasia, e ve meto duti e do su'l steso piano: la finirè de far barufa come fioleti visiài e stùpidi, de farse ripìche, sgarbi e darve 'doso come cretini? Volè capir una bona volta che par la vostra zmània de dimostrarghe al mondo che ezistè fe' solo che dano a la zente che cua ghe vivi?

       Anca mi Nineta cito cualchidun 'sta volta, mia mama che dizi senpre: "Inte la bota picia...sta el velen!"

E lori ze pici, Nineta, Slovenia e Croasia: se' pici! La zente no sa njanca dove mostrar dove che se' su la carta geografica e voi, pieni de senso de inferiorità cosa fe'? Dimostrè de eser ancora più pici, dimostrè de eser cuel che se': un branco de trogloditi! E finìla una bona volta e lasène viver!

       Dino...Kozlevac, te prego, se servi una man par tapar el tunel son cua...ricordite...per favor...nolegio anca un bager, trovo 7000 betoniere, assumo anca i castori par far una diga se servi! Te prego, ciamime!

 

Ah...e Valter, Flego, lei che la ze a Bruxelles, la ghe spieghi che 'sti cua i ga de finirla co 'sti giogheti maladi, che ze solo una maznada de frustradi, che no i ze capaci de governar njanca un caìcio, figuremose do Republiche.

Valter, mi so che ti son tanto inpenjà, ma una parola dìghela, no?...dighe che semo in man a i primitivi, che a noi zente normale no ne va ben de eser ciolti in giro onji giorno, che cua gavemo solo voja de lavorar e guadanjarse el pan, che cua confini noi no li gavemo mai avudi...ti son la nostra unica speransa in Europa...e se no i te scolta...ciamime che ghe lo digo mi! Oh, bon! Che mi Bruxelles me li manjo...in padela, fati adeso i cavoleti freschi freschi, Nineta...ma sa che boni? Ciolti al marcà.

La mia parola de ogi? "Tapedin"...zente, finìmola de eser el tapedin, finìmola de farse rusar le scarpe in testa! La testa uzèmola par pensar...e par parlar, sensa guere me racomando, ma femo sentir la nostra una bona volta, ah!

 

       Ciao Nineta, te mando un bazo...ah e in prospetiva de San Valentino te rispondo cusì: "San Valentino è alle porte!"..."Chiudile!"

Hahahahahaha...Maleficent...